المی چیزانی امبار ءَ ایر  کنگ، مصنوعی کمی پیداک کنگ ءُ بے دروریں نرخ زورگ ءِ ھلاپ ءَ سکیں کارروائی کنگ بیت ، نائب مزن وزیر

اسلام آباد۔16اکتوبر  (اے پی پی): نائب مزن وزیر ءُ درئی کارانی وزیر سینیٹر محمد اسحاق ڈار ءَ گوشت کہ المی سامان آنی امبار ءَ ایر  کنگ، مصنوعی کمی پیداک کنگ ءُ بے دروریں نرخ زورگ ءِ ھلاپ ءَ سکیں گامگیج زورگ بیت۔ وزارت ءِ درئی کار ءِ نیمگ ءَ جمعہ ءِ روچ ءَ جاڑی بوتگیں بیان ءِ رد ءَ نائب مزن وزیر ءُ درئی کار ءِ وزیر سینیٹر محمد اسحاق ڈار ءِ سروکی ءَ کابینہ کمیٹی ءِ دیوان برجم دارگ بوتگ ایشی ءِ تہ المی وردن ءِ چیز آنی اسٹاک ءُ نرخ آنی سر ءَ چار ءُ تپاسی کنگ بوتگ۔ گند ءُ نند ءَ راجی وردن ءُ وراک ءِ سلامتی ءُ پٹ ءُ پول ءِ وفاقی وزیر، موسمیاتی مٹ ءُ بدلی ءِ وفاقی وزیر، مزن وزیر ءِ ھاسیں کمکار طارق باجوہ، سیکرٹری کامرس ءُ سیادی داروکیں وفاقی ءُ صوبائی وزارت ءُ محکمہ آنی مزنیں نمائندگ آنی بھر زوری بوتگ۔ کمیٹی ءَ المی چیز آنی اسٹاک، سپلائی ءِ بندوبست ءُ نرخ آنی سر ءَ چار ءُ تپاسی کتگ۔ نائب مزن وزیر ءُ وزیر ءِ درئی کار ءَ را گوشگ بوت کہ ملک ءِ ضلورت آناں پیلو کنگ ءِ واستہ وردن ءُ وراک ءِ چیز آنی گیشیں امبار ءَ ایر  است انت، کمی ءِ ترس نیست ءُ نہادانی تہ ءَ استحکام بوھگ ءَ انت۔ نائب مزن وزیر ءُ وزیر ءِ درئی کار ءَ سیادی داروکیں واکدار آناں ہدایت کت کہ آ مزن وزیر ءِ ہدایت ءِ رد ءَ ملکی صارف آناں آسراتی پجارینگ ءِ واستہ سپلائی چین ءُ المی سامان آنی نہاد آنی سر ءَ مُدام چار ءُ تپاسی بہ کن اَنت۔ آئی ءَ گوشت کہ المی سامان آنی امبار ءَ ایر  کنگ، مصنوعی کمی پیداک کنگ ءُ بے دروریں نرخ زورگ ءِ ھلاپ ءَ سکیں گامگیج زورگ بیت۔