حکومت ضمنی مالیاتی (ترمیم) بل 2018 ء ءِ قومی اسمبلی ٹی پیش کرے
اسلام آباد۔ 18 ستمبر (اے پی پی) قومی اسمبلی ٹی حکومت ضمنی مالیاتی (ترمیم) بل 2018 ء ءِ پیش کرینے ہرانار داٹ وزیراعظم، ہرچار آ گورنرو وزیراعلاک و بنجائی وزیر آتا تنخواہ و آسراتی تے ٹی دوئی خراج استثنیٰ ءِ چٹفنگک، مالی بل 2018 ء ٹی انکم ٹیکس اٹی تروک آ چھوٹ اٹی ردوبدل کننگانے، پنشن اٹی 10 درسد ودکی کننگک، 1800 سی سی آن زیات پرتعیش گاڈی تیا ڈیوٹی 10 درسد آن ودفسا 20 درسد کننگانے، پٹرولیم لیوی نا مد اٹی 100 ارب روپئی نا ودکی لیوی پدی ہلنگ نا سلاہ تننگانے ہراڑآن پٹرولیم مصنوعات آتا نہاد آتے ٹی کمتی واقع مریک ، ڈیم تا جوڑ جاڑ ، سی پیک ڈٹ ، ہائیر ایجوکیشن نا شونداری پروگرام پدریسہ برجاسلک، شونداری بجٹ آ 725 ارب روپئی خڑچ کننگک، سگریٹ آ خراج آتے ٹی ودکی کننگ نا سلاہ اوار ءِ ، ریونیو ٹی 183 ارب روپئی نا ودکی کن گام گیج تجویز کننگانے ہرافتیان 92 ارب روپئی پوسکن ءُ خراج خلنگ آن بیدس پوسکن آ ٹیکنالوجی و گچین انتظامی گام گیج آتا کمک اٹ پورو کننگک۔ اگہ دااصلاحات ءِ اتنگتو تو خسارہ 2790 ارب روپئی اسکان سرمریک ہرانا پاکستان متحمل مننگ کپک۔ وزیراعظم عمران خان نا کماشی ٹی ہندن ءُ پاکستان اس جوڑ کننگ والا اُن ہراڑآ مچ آ دنیا فخر کیک۔ سے شنبے نادے قومی اسمبلی ٹی وزیر خزانہ اسد عمر فنانس بل 2018-19 ء ٹی خراج و ڈیوٹی تا کچ اٹی ردوبدل کن ضمنی مالیاتی (ترمیمی) بل 2018 ءِ پیش کرے۔ داوخت آ اوپارے کہ ضمنی فنانس بل پیش کننگ نا ننے داخاطرآن ضرورت پیش بس انتئے کہ نن بجٹ نا وخت آ دا اعتراض ءِ چست کریسن کہ مچ آ سال انا بجٹ ءِ پیش کننگپ۔ اِرا سوب آتا بناء آ ننے ضمنی فنانس بل ءِ پیش کروئی تما۔ ملک اٹی معاشی چاہندار آک ہم جاچ ہلکونو کہ بجٹ نا وخت آ منظور کرفوک آ فنانس بل اصل حق آتون مطابقت تخپک۔ اگہ نن دا بدلی ءِ اتپنہ تو ملک انا معیشت کن جوان مفک۔ حالیت آک جوان افس نن قوم انا مون آ راست پاننگ خوانہ۔ نن ہندن ءُ حالیت ودی کننگ خوانہ کہ روزگار نا وارخواہی ودی مرے۔ برآمدآک گچین مریر، وام تیا سیبو کننگپ۔ اسد عمر گدرینگوک آ بجٹ خسارہ 6.6 درسد اسکان سرمسنے، ساڑی آ بجٹ خسارہ گردشی کڑز آتا سوب 8.6 درسد اسکان سرمسنے۔ مسلم لیگ (ن) نا حکومت اقتصادی حالیت آتا بابت ہراگام گیج آتے کرے او تاریخ نا بشخ ءُ۔ گدرینگوک آ اسہ سال اٹی بیرہ بجلی نا بشخ اٹی نسخان 450 ارب و گیس اٹی 100 ارب روپئی اسکان سرمس۔ اینخو نا سال دانسخان 2900 ارب اسکان سرمننگ نا خلیس ءِ ۔ اوپارے کہ 2012-13 ء ٹی کرنٹ اکاؤنٹ نسخان دونیم ارب ڈالر ئس۔ گدرینگوک آ سال دا نسخان 18 ءُ نیم ارب ڈالر اسکان سرمسنے۔ مسلم لیگ (ن) نا حکومت نا دوراٹی کڑز آتے ٹی 34 ارب ڈالر نا ودکی مس۔ ہرانا سوب زرمبادلہ نا بابت خلیس نا گھنٹی خلنگ بناکرے۔ درآمد آک بھاز ودانو، برآمد آک اونا مقابلہ ٹی بھاز کم ئسر ہرانا سوب ڈالر نا مقابلہ ٹی روپئی نا قدر اٹی 20 روپئی کمتی کننگا۔ اگہ حالیت آک ہندن سلیسر تو روپئی نا قدر پین زہمی مریک۔ پٹرول، خوردنی تیل و گیس انا نہاد آتے ٹی ودکی مریک۔ اگہ داوخت آ گام گیج چست کننگتو تو لس بندغ نا زند براہ راست زہمی مریک۔ سی پیک نا ڈٹ انا رداٹ اسہ پروگرام اسے ٹی ہم کمتی اتپنہ۔ ڈیم تا جوڑ جاڑ کن ہم جتا کروک پیسہ غاتیان ہم زیات پیسہ خڑچ کینہ۔ دیامر بھاشا و مہمند ڈیم تا جوڑ جاڑ کن چیف جسٹس و وزیراعظم نا فنڈز قائم ءُ۔ شونداری بجٹ آ 725ارب روپئی خڑچ کینہ۔ گدرینگوک آ سال خڑچ مروک آ پیسہ غاتا مقابلہ ٹی دہ درسد ودکی مریک۔ کراچی انفراسٹرکچر نا جوڑ جاڑ کن 50 ارب روپئی تننگک۔ دا پبلک پرائیویٹ پارٹنر شپ نا رداٹ مریک۔ پی ایس ڈی پی آن 575ارب و خراج اصلاحات نا کمک اٹ 100 ار ب روپئی نا بست و بند کینہ ۔ دنیا ننے آن گدرینگوک آ سی سال اٹی مون آ ہنانے۔ مستین اٹی ہراکاریمک جوان مسنو او ہندن سلرہ۔ داٹی ڈیم تا جوڑ جاڑ و سی پیک نا ڈٹ اکن کاریم ءِ برجاتخنہ۔ دا ملک اللہ تعالیٰ نا تروک اوسے، سوب اس ارے کہ دا 27 روچہ غا جوڑ مس۔ ملک انا شونداری کن بلاول بھٹو تون اوار غٹ شریدار مریرہ۔ عمران خان نا کماشی ٹی نن ملک ءِ بدل کننگ والا اُن۔ دنیا داڑآ فخر کیک۔ اوپارے کہ ہائیر ایجوکیشن کن ڈٹ آتے ہم برجاتخنگک۔
