کوئٹہ ٹی 265فراری سلہہ بٹسا قومی دنگ اٹی اوار
کوئٹہ۔ 18 ستمبر (اے پی پی) کوئٹہ ٹی 265 فراری سلہہ بٹسا قومی دنگ اٹی اوار مسنو، جتا کالعدم تنظیم تا فراریک وزیراعلیٰ بلوچستان جام کمال خان ، کمانڈر سدرن کمانڈلیفٹیننٹ جنرل عاصم سلیم باجوہ ، تحریک انصاف نا صوبائی صدر سردار یارمحمد رند ، وزیرداخلہ بلوچستان سلیم کھوسہ، ڈپٹی اسپیکربلوچستان اسمبلی سردار بابر خان و آئی جی ایف سی میجر جنرل ندیم انجم نا مون آ سلہہ غاتے جمع کرفیر، فراری تا تعلق کوہلو، قلات، لورالائی، ڈیرہ بگٹی، سبی، خضدار و نوشکی آن ئس۔ جمع کرفوک آ سلہہ غاتے ٹی 53ایس ایم جی، 2راکٹ لانچر، اسہ ایل ایم جی و رائفل اوار ئسر۔ دود آن وزیراعلیٰ بلوچستان جام کمال خان تران کرسا پارے کہ دشمن تینا مسخت آتا دوئی کننگ کن کودک خلقت ءِ ورغلائفے ولے بلوچستان نا الس ثابت کرینے کہ او باشعور ءُ۔ اوپارے کہ ننا عزم ءِ کہ بلوچستان آن پسماندگی ءِ مر کروئی ءِ حکومت ءِ السی ویل آتا ادراک ءِ ، بے روزگاری نا چٹفنگ، جان جوڑی و تعلیم نا فراوانی حکومت کن بھلو چیلنج ءُ۔ وزیراعلیٰ مستی پارے کہ حکومت ءِ اسہ چیلنج اس سمجھسا قبول کرینن، بروک آ پنچ سال اٹی خلقت ءِ اسہ شونہال شون ہلوک ءُ بلوچستان اس تروئی ءِ، وزیراعلیٰ پارے کہ بلوچستان نا مخلوط حکومت اٹی اوار پارٹی تے داسہ دا ثابت کروئی ءِ کہ او پنچ سال اٹی بلوچستان اٹی شونداری کاریم تا جال اس شاغرہ ، خلقت ءِ میرٹ آ روزگار ایترہ، ہراایلمک مش تیا ہنار شاید اونا دا سوب ننا گچین مروک آ نمائندہ غاتا بے حسی ءِ کہ ہراعلاقہ غاتے ٹی جان جوڑی، تعلیم و زند انا ایلو آسراتی تا فراوانی ئس ولے گچین مروک آ نمائندہ غاتے ہرا کاریم ءِ کروئی ئسک او کتوس، ہرانا سوب داخلقت مایوس مرسا مش تیا ہنار ولے اوفتا خوش قسمتی ءِ کہ او پدی قومی دنگ اٹی اوار مرسا بلوچستان و پاکستان نا شونداری کن تینا پبی کڑد ءِ ادا کیرہ انتئے کہ ہر شاری نا داکوشست ءِ کہ اونا علاقہ ٹی زند انا غٹ آسراتیک ساڑی مریر و ایلو صوبہ نا خلقت آمبار شونہال ءُ زند اس تدیفنگ کیر۔ اوپارے کہ اینو نا دود اٹی حکومت و سول ملٹری لیڈر شپ نا اسہ لین اٹ تولنگ داہیت ءِ ثابت کیک کہ نن صوبہ ءِ شون تننگ خوانہ، وزیراعلیٰ بلوچستان پارے کہ ایلو صوبہ غاتا نسبت بلوچستان اٹی پسماندگی زیات ءِ داڑکن ننے دے و نن ءِ اسٹ کرسا کاریم کروئی مریک تانکہ پنچ سال آن پد ہراتم نن دُوارہ تینا الس آکان تو او ننے شرف ایتر ہنداخاطرآن صوبہ نا الس بلوچستان عوامی پارٹی و اونا سیوتی تے وونٹ ترسا گچین کریر تانکہ او اوفتا علاقہ غاتے ٹی بنداوی آسراتی تا فراوانی ءِ المی جوڑ کیر۔ دود اٹی صوبائی وزیر آک سردار عبدالرحمان کھیتران ، نورمحمد دمڑ، عبدالخالق ہزارہ ، نصیب اللہ مری، سردار صالح بھوتانی ، اسمبلی نا باسک آک نوابزادہ گہرام بگٹی، محمد خان لہڑی تون اوار ایلوفک ہم ساڑی ئسر۔ دود آن فراری کمانڈر آ وطن تون وفاداری نا عہد کریر و پین وخت اس ملک دشمن سرجزآتے ٹی اوار مفننگ نا عہد کریر۔
