بلوچستان نا تعلیمی بشخ اٹی بی آر سی خضدار نا اہم ءُ کڑد اس مسنے ہرا باعث فخر ءِ، بلوچستان نا طالب علم آتالائخی تیٹی ہچ ءُ کمتی اس اف، طالب علم آتے ڈکھوک لائخی تے تالان کننگ نا گرج ءِ، ڈپٹی اسپیکر قومی اسمبلی قاسم خان سوری

کوئٹہ۔ 18 ستمبر (اے پی پی) بلوچستان نا طالب علم آتے ٹی لائخی تا ہچ ءُ کمتی اس اف ، طالب علم آتے ڈکھوک آ لائخی تے تالان کننگ نا گرج ءِ۔ داخیال آتا درشانی ءِ ڈپٹی اسپیکر قومی اسمبلی قاسم خان سوری بلوچستان ریذیڈنشل کالج خضدار نا پروفیسر انعام اللہ مینگل نا کماشی ٹی پوزیشن ہلوک مقرر و طالب علم سمیع اللہ کامران نور و ایلوفتیا تالان ڈل اتون اوڑدہی ٹی ہیت وگپ کرسا کرے۔ ڈپٹی اسپیکر قاسم خان سوری درو بلوچستان تقریری مقابلہ غاتے ٹی بی آرسی خضدار نا طالب علم سمیع اللہ ءِ اولیکو پوزیشن ہلنگ آ مبارکباد ترسا پارے کہ بلوچستان نا طالب علم آتے ٹی لائخی تا ہچ ءُ کمتی اس اف گرج دا ہیت انا ءِ کہ طالب علم آتے ٹی ڈکھوک لائخی تے تالان کننگے، صوبہ نا طالب علم آتا گچین راہشونی آن طالب علم آک غٹ بشخ آتے ٹی تینا لائخی تے نشان تننگ کیرہ بلوچستان نا طالب علم آک تینا قابلیت نا زی آ ملک انا جتا تعلیمی ادارہ غاتے ٹی تینا لائخی تے مون آ ایسونو۔ اوپارے کہ تعلیم نا بشخ آ چکار کننگ اٹی ہی شونداری و شونہالی نا راز تخوک ءِ تعلیم نا بشخ ساڑی آ بنجائی حکومت نا اولیت آتے ٹی اوار ءِ۔