اسلام آباد۔ 18 ستمبر (اے پی پی) وزیر مملکت وزیر داخلہ شہریار خان آفریدی پارینے کہ آئین پاکستان غٹ بنجائی اکائی تیٹی رہینگوک آتا بے رنگ و نسل عزت نا ضمانت ایتک ، فلم و ڈرامہ غاتے ٹی خاص ءُ علاقہ سے نا خلقت نا زبان و ڈریس کوڈ ءِ ہائی لائٹ کننگ سہی اف، خاص علاقہ و زبان ءِ ہائی لائٹ کننگ نا معاملہ نا نوٹسءِ ہلنگانے۔ سے شنبے نادے قومی اسمبلی ٹی سویلی و قطبی وزیرستان آن تعلق تخوک آ اسمبلی نا باسک علی وزیر و محسن داوڑ پنجاب حکومت نا محرم نا بابت اسہ اشتہار اسے نا معاملہ ءِ چست کریر و پاریر کہ ہندا اشتہار اٹی علی وزیر ، محسن داوڑ و منظور پشتین نا عکس ءِ نشان تننگانے ہراڑآ نسلی منافرت ءِ تالان کرسا نشان تننگانے۔ بدقسمتی نا ہیت اسے کہ حق انا تحریک آتے پنجاب اٹی منفی وڑاٹ پیش کننگ انگ ءِ۔ نن دا نا جاست وپاست نا خواست کینہ۔ محسن داوڑ پارے کہ دا اشتہار پنجاب حکومت نا کنڈآن بسنے ہنداخاطرآن پنجاب حکومت ءِ دانا بایدے بشخنداری کروئی مرے۔ اوپارے کہ جوان مسکہ کہ پنجاب حکومت تینا اشتہار اٹی کالعدم تنظیم تے اوار کروسس۔ وزیر دفاع پرویز خٹک پارے کہ دا اسہ المیہ اسے کہ ننا شرفدار آ باسک آتے دا اشتہار اٹی اوار کننگانے۔ ای داڑآ معذرت کریسٹ ولے ہراخلقت اشتہار تسنے اوفک ہم بایدے معذرت کیر۔ اودامعاملہ غا اسپیکر نا رولنگ و انکوائری نا سلاہ تسر۔
