اسلام آباد۔ 17 ستمبر (اے پی پی) پاکستان و برطانیہ منی لانڈرنگ ، کرپشن و منظم ڈوہ انا برخلاف اسیجا گام گیج آتیا امنا کرسا پارینو کہ ہڑتوم آ ملک آک دا بابت آخبت اٹ کاریم ءِ برجاتخرہ، ڈوہدار تا حوالگی نا بابت ہڑتوم آ ملک آتا نیام اٹ کاریم مننگ ءِ، فنانشل ایکشن ٹاسک فورس نا گرے لسٹ نا فہرست آن کشنگ کن پاکستان تون اواری اٹ کاریم کننگ اُن، برطانوی کمپنیک پاکستان اٹی زرکاری کننگ خوارہ۔ کرپشن نا چٹفنگ پاکستان و برطانیہ نا اولیتءِ، پاکستان دہشت گردی آن زیات زہمی مس۔ داخیال آتا درشانی ءِ بنجائی وزیر کانود و انصاف فروغ نسیم، برطانوی وزیر داخلہ ساجد جاوید ، بنجائی وزیر داخلہ شہریار خان آفریدی واحتساب کن وزیراعظم نا خصوصی کمکار شہزاد اکبر برطانوی وزیر داخلہ نا وزیراعظم عمران خان، وزیر خارجہ شاہ محمود قریشی، وزیر داخلہ شہریار آفریدی و ایلو فتے تون اوڑدہی آن پد وزیراعظم سیکرٹریٹ اٹی اسیجا پریس کانفرنس آن تران کرسا کرے۔ پاکستان اٹی برطانوی سفارت خانہ نا کمامدارآک ہم داوخت آ ساڑی ئسر۔ بنجائی وزیر کانود و انصاف بیرسٹر فروغ نسیم پارے کہ برطانوی وزیر داخلہ تون جسٹس اینڈ اکاؤنٹیبلیٹی انیشٹیو پنی ءُ ڈکلریشن نا بابت معاملہ غاتیا سرجم ہیت وگپ مسنے ، ہڑتوم آ ملک آک منی لانڈرنگ ،کرپشن و منظم ڈوہ انا انسداد اٹی کمکاری ءِ پین مون آ دیرہ۔
