راولپنڈی۔ 17 ستمبر (اے پی پی) وزیر دفاع پرویز خٹک تون پاکستان اٹی متعین جاپان نا سفیر تاکاشی کورائی اوڑدہی کرے و اودے وزارت دفاع نا قلمدان ءِ سنبھالنگ آ مبارکبادی تس۔ وزارت دفاع ٹی مروک آ دا اوڑدہی ٹی وزیر دفاع پرویز خٹک پاکستان و جاپان نا نیام اٹ خڑکی تاریخی تعلقداری تے مون آ تخا و پاکستان نا شونداری و شونہالی ٹی جاپان نا کڑد انا ستاءِ کرے۔ وزیر دفاع پرویز خٹک اومیت ظاہر کرے کہ جاپان سی پیک اٹی شمولیت نا کمک اٹ پاکستان نا اقتصادی سرجزآتا سوب جوڑ مریک۔ داڑتون اوار اوار تین پہ تینی مفاد اٹی میری ٹائم و صنعتی پیداوار نا بشخ آتے ٹی زرکاری آ ہم سجفک۔ وزیر دفاع اوغانستان اٹی امن و سوگوی نا مون آ دننگ اٹ جاپان نا کڑد انا ستاءِ کرسا دہشت گردی نا چٹفنگ کن پاکستان نا کوشست آتے ٹی جاپان نا کڑد انا ہم ستاءِ کرے۔ وزیر دفاع پاکستان و جاپان نا فوجی سیاسی سرکڑدہ نا نیام اٹ ہیت وگپ نا جاپانی حکومت نا گام گیج نا ہم ستاءِ کرے۔ اوڑدہی ٹی دفاعی بشخ اٹی تین پہ تینی کمکاری نا گمان و دفاعی شریک کار ءِ سوگو جوڑ کننگ آہم خیال آتا درشانی ءِ کننگا۔ جاپانی سفیر تین پہ تینی اشتراک کار نا پوسکن آ کسر تا گمان آتے کن جاپانی حکومت نا پاکستان تون کمکاری ءِ برجا تخنگ نا باوری ترفے۔
