قومی کمیشن انسانی حق انا کنڈآن لٹریسی واک اس اڈتننگ ، واک انا مسخت ورنا، تعلیم یافتہ بندغ و غیر سرکاری تنظیم تے تعلیم نا مون آ دننگ کن متحرک کروئی ءِ، رزینہ عالم خان
ساڑی آ حکومت کن اسکول آتیان پیشن چناتے اسکول اٹی اتنگ غٹ آن بھلا چیلنج و ننا اولیت ءِ
بنجائی وزیر تعلیم و کسبی تربیت شفقت محمود
اسلام آباد۔ 07 ستمبر (اے پی پی) بنجائی وزیر تعلیم و کسبی تربیت شفقت محمود پارینے کہ ساڑی آ حکومت کن اسکول آتیان پیشن چناتے اسکول اٹی اتنگ غٹ آن بھلا چیلنج ءِ، اسکول آن پیشن چناتے اسکول آتے ٹی اتنگ ننا اولیت ءِ۔ داخیال آتا درشانی ءِ او قومی کمیشن انسانی حق انا کنڈآن لٹریسی واک آن تران کرسا کرے ہرانا بست و بند ءِ جہانی یوم خواندگی نا مناسبت آن کننگاسس۔ بنجائی وزیر پارے کہ مچ آ ملک اٹی بے شمار چناک اسکول آتیان پیشن ءُ۔ اوپارے کہ اسکول آ ہِننگ نا وئی اسکان ہرا چناک سرمسنو اوفتے اسکول آتے ٹی اتنگ کن ہر وڑگام گیج کننگک۔ اوپارے کہ حکومت خواندگی نا کچ ءِ ودفنگ و تعلیم نا بنداو آ راجی و اقتصادی شونداری کن پرعزم ءِ۔ او ملک اٹی تعلیم نا مون آ دننگ کن این سی ایچ ڈی نا کڑد انا ستاءِ کرے و پارے کہ خواندگی ٹی ودکی کن حکومت ادارہ غاتا ہروڑ کمک ءِ کیک۔ داوخت آ تران کرسا این سی ایچ ڈی نا چیئرپرسن رزینہ عالم خان پارے کہ دادے ءِ اڈتننگ نا مسخت خواندگی نا بابت شعور تالان کننگ ءِ و بندغ ، خاہوت و راج اکن تعلیم نا اہمیت ءِ مون آ اتوئی ءِ۔ اوپارے کہ واک انا مسخت ورنا، تعلیم یافتہ بندغ و غیر سرکاری تنظیم تے تعلیم نا مون آ ددننگ کن متحرک کروئی ءِ۔ اوپارے کہ داڑآن خواندگی ٹی ودکی کن حکومت نا عزم انا درشانی ہم مریک۔ داوخت آ ’’اے پی پی‘‘ تون ہیت وگپ کرسا رزینہ عالم خان پارے کہ 8 ستمبرآ دادے انا مناسبت آن سیمینار و شرہ ہم اڈ تننگک تانکہ تعلیم نا بشخ انا ویل آتے کم کننگ و دابشخ انا شونداری کن سلاہ و آراء تے مون آ اتنگ مرے۔ واک اٹی یونیسکو نا نمائندہ ، تعلیم نا چاہندار ، طالب علم آتون اوار چندی زند انا بشخ آتیان تعلق تخوک آ بندغ آک شرکت کریر۔
