اسلام آباد۔ 05جنوری (اے پی پی) گوادر بندرگاہ اتھارٹی نا چیئرمین دوستین جمال دین پارینے کہ پاک چین اقتصادی راہداری ڈٹ انا مسٹ میکو مرحلہ مئی 2017ءٹی پورو مریک۔ احوالکارآتون ہیت وگپ کرسا اوپارے کہ بیجنگ اٹی مروک آ جے سی سی نا شش می دیوان دا اعتبار آن اہمیت نا حامل ئِ انتئے کہ داٹی پاکستان نا غٹ صوبہ غاتا کمامدارآک پوروتیاری اتون شریک مسر۔ اوپارے کہ دا ہموڈٹ ئِ ہرانا فائدہ غاک غٹ صوبہ ، اوفتا الس و ڈیہہ نا ایلو ملک آتے رسینگک۔ دوستین پارے کہ چین پاکستان اقتصادی راہداری نا ارٹ میکو مرحلہ ٹی پترینگ انگ ئِ ہرازوت پوروی نا مرحلہ غاتے طے کیک۔ اوپارے کہ بلوچستان پاکستان نا کل رقبہ نا 44درسد ئِ و چین پاک اقتصادی راہداری ڈٹ آن غٹ آن زیات فائدہ ہم ہنداصوبہ ئِ رسینگک وخت اس کہ دانا کمک اٹ ایلو صوبہ غاتے ہم فائدہ دوئی مریک۔ اوپارے کہ گوادر پورٹ دنیا ٹی غٹ آن اختہ و گہری بندرگاہ تیان اسٹ ئِ ، ہرانا پوروی وڑاٹ فعال مننگ آن پاکستان تون اوار ڈیہہ و مچ آ دنیا ٹی شونہالی بریک۔ چیئرمین اتھارٹی پارے کہ تدوک آ دے تیٹی وزیراعظم محمد نواز شریف سی پیک ڈٹ انا مسٹ می زون انا ڈٹ آتا بنائِ کرے ہراٹی اوگوادر، کوئٹہ ونوکنڈی سمت ایلو علاقہ غاتے کن کیہی ڈٹ آتا پڑو ئِ کرینے ہراٹی ماہی گیر ، سوشل سیکٹر و دیر انا ڈٹ آک اوار ئُ اوپارے کہ وزیراعظم پاکستان نا پارت آ گوادر اٹی اسہ یونیورسٹی اسے نا اڈتننگ نا عمل اٹی بریک ہرادے چینی یونیورسٹی تون گنڈنگک ہراڑآن بلوچستان اٹی ورناتا تعلیم نا گچین آسراتی دو بریک و روزگار نا دوئی ٹی آسانی مریک۔ دوستین پارے کہ اینخو سال دابابت جوان ئُ سال اس مریک انتئے کہ داٹی چین پاکستان اقتصادی راہداری ڈٹ انا مسٹ میکو زون نا ڈٹ پورو مریک۔
