اسلام آباد۔ 24جولائی (اے پی پی) مچ آ ملک اٹی بروک آ لس گچین کاری تے کن پولنگ (اینو) چارشنبے نادے آ مریک ، 10 کروڑ 59 لکھ 55ہزار 409 ووٹر بروک آ پنچ سال اکن قومی اسمبلی نا 270 و ہر چار آ صوبائی اسمبلی تے کن تینا نمائندہ غاتا گچینی ءِ کیرہ، کل 3 ہزار 675 اومیت دار قومی اسمبلی وخت اس کہ 8 ہزار 895 اومیت دار صوبائی اسمبلی تا گچین کاری ٹی پڑآٹی ءُ۔ پولنگ نادے مچ آ ملک اٹی 25جولائی آ لس چھٹی نا پڑو ءِ کننگانے۔ پولنگ سہب انا 8بجہ غان شام انا 6 بجہ اسکان بیدس وقفہ غان برجاسلک۔ پولنگ اسٹیشن نا تہٹی و پیشن پاک فوج انا اِرا ، اِرا ورناتعینات مریک۔ قومی اسمبلی نا 2حلقہ ٹی گچین کاری تے پد بٹنگانے، کل 85ہزار آن زیات پولنگ اسٹیشن جوڑ کننگانے ہرافتیان 17 ہزار آن زیات پولنگ اسٹیشن بے کچ حساس گوندنگانو، دافتے ٹی اسلام آباد و پنجاپ آن 5487، سندھ 5878، فاٹا، خیبرپختونخوا 3874 وخت اس کہ بلوچستان اٹی 1768 پولنگ اسٹیشن اوار ءُ ۔ مچ آملک اٹی زالبول ووٹر آتا کچ 4 کروڑ 67 لکھ 31 ہزار 146، نرینہ ووٹرآتاکچ 5 کروڑ 92 لکھ24 ہزار 263 ءِ ۔ پنجاب اٹی ووٹرآتاکل کچ6 کروڑ 6 لکھ72 ہزار 870، سندھ 2 کروڑ 23 لکھ91 ہزار 244، خیبرپختونخوا اسہ کروڑ 53 لکھ16 ہزار 299، بلوچستان 42 لکھ99 ہزار 494، فاٹا 25 لکھ10 ہزار 154 وخت اس کہ اسلام آباد 7 لکھ65 ہزار 348 ءِ ۔ مسہ نیم لکھ فوجی ورناتیان بیدس چار ءُ نیم لکھ انا خڑک سول آرمڈ فورس آتا کارندہ غاک گچین کاری تیٹی امن و ایمنی ءِ برقرار تخنگ کن خذمت سرانجام ایترہ ۔ کل ہفت لکھ انا خڑک پولنگ عملہ تینا فرض ءِ پورو کیرہ ۔ الیکشن کمیشن غٹ عملہ و سکیورٹی ادارہ غاتا تعینات کارندہ غاتیان غیر جانبدار مرسا تینا فرض ءِ سرانجام تننگ نا سوغند ہلکونے ۔ سیاسی جماعت ، اومیت دار ، سیکورٹی کارندہ ، میڈیا، درملکی و ملکی مبصرآتے کن ضابطہ اخلاق جاری کننگانے ۔ 60 ہزار آن زیات میڈیا نا نمائندہ غاتے الیکشن کمیشن نا کنڈآن پولنگ اسٹیشن اسکان رسینگ کن خصوصی پاس جاری کننگانے ۔ میڈیا ءِ پابند کننگانے کہ او پولنگ نا چٹنگ نا اسہ گھنٹہ سے آن پد ہفت بجہ اسکان ہچ ءُ رزلٹ اس جاری کننگ کپسہ ۔ پریزائیڈنگ آفیسرآر ٹی ایس سسٹم نارداٹ زوتی وڑاٹ پولنگ اسٹیشن نانتیجہ ءِ الیکشن کمیشن وریٹرننگ آفیسر ءِ راہی کننگ نا پابند مریک ۔ الیکشن کمیشن پولنگ اسٹیشن آتا بارواٹ پورو معلومداری ویب سائٹ آجاری کرینے ۔ الیکشن کمیشن نا کنڈآن فوج انا چاروکی ٹی بیلٹ پیپرز و گچین کاری مواد آتا ترسیل نا کاریم ءِ پورو کننگانے ۔ پاکستان نا فوج و دُن انگا سرکاری ملازم آک ہرا تینا سرکاری زمواری تا سوب آن ڈیوٹی مریرہ او تینا وونٹ ءِ پوسٹل بیلٹ نا کمک اٹ کاسٹ کرینو۔ الیکشن کمیشن نا مچ آ ملک اٹی مانیٹرنگ ٹیمک ضابطہ اخلاق نا خلاف ورزی آ اومیت دار آتا برخلاف دمدستی کارروائی کرینے ۔ گچین کاری کانود 2017ء نار داٹ غٹ سیاسی جماعت آک 5 درسد ٹکٹ عمومی نشست آتیا زالبول ءِ تننگ نا پابند کننگاسس اوکان پد قومی اسمبلی ٹی پاکستان پیپلز پارٹی 43، تحریک انصاف 42، مسلم لیگ (ن) 37، متحدہ مجلس عمل 33، متحدہ قومی موومنٹ پاکستان 6، گرینڈ ڈیموکریٹک الائنس 8 وعوامی نیشنل پارٹی 14 زالبول اومیت دار آتے ٹکٹ جاری کرینو۔ پنجاب اسمبلی کن 4 ہزار 242، سندھ اسمبلی 2 ہزار 382، خیبرپختونخوا اسہ ہزار 264، بلوچستان اسمبلی کن اسہ ہزار ہفت اومیت دار میدان اٹی ءُ ۔ پنجاب نا قومی اسمبلی نا141 نشست آتیا 1696 اومیت دار، سندھ کی 61 نشست آتیا872، خیبرپختونخوا و فاٹا نا51 نشست آتیا760 وخت اس کہ بلوچستان آن قومی اسمبلی نا16 نشست آتیا 303 اومیت دارآتیٹی مقابلہ مریک ۔
