ہندی و درملکی زرکاری نا مون آ دننگ و مون تروک اڑاند آتے مر کننگ کن بنجائی و صوبائی حکومت، درملکی مشن و تعلقدار حلقہ غاتا نیام اٹ کمکاری ءِ سوگوی تننگ نا گرج ءِ ، نگران وزیراعظم جسٹس (ر) ناصر الملک
اسلام آباد۔ 24جولائی (اے پی پی) نگران وزیراعظم جسٹس (ر) ناصر الملک ملک اٹی ہندی و درملکی زرکاری نا مون آ دننگ و مون تروک اڑاند آتے مر کننگ کن بنجائی و صوبائی حکومت، درملکی مشن، و تعلقدار حلقہ غاتا نیام اٹ کمکاری ءِ سوگوی تننگ نا گرج آ زور شاغانے۔ اوداہیت ءِ سے شنبے نادے وزیراعظم آفس اٹی زرکاری بورڈ انا بارواٹ احوال نا کماشی ءِ کرسا پارے۔ وزیر خزانہ ڈاکٹر شمشاد اختر، سیکرٹری خزانہ عارف احمد خان، چیئرپرسن ایف بی آر رخسانہ یاسمین، سیکرٹری زرکاری بورڈ محمد جہانزیب خان، وزیراعظم نا ایڈیشنل سیکرٹری ڈاکٹر کاظم نیاز و ایلو سینئر کمامدارآک ہم داوخت آ ساڑی ئسر۔ سیکرٹری زرکاری بورڈ محمد جہانزیب خان وزیراعظم ءِ ملک اٹی ہندی و درملکی زرکاری نا مون آ دننگ ، کاروباری برادری ءِ آسراتی تننگ، کانود سازی ٹی گچینی ، زرکاری ءِ اتنگ کن ریگولیٹری و پالیسی فریم ورک ، کاروبار اٹی آسانی ودی کننگ و نمان ادارہ نا حیثیت اٹ سی پیک ڈٹ جاٹ انا رداٹ صنعتی کمکاری ءِ سوگوی تننگ اٹ ادارہ نا کڑد انا بارواٹ معلومدار کرے۔ اوملک اٹی زرکاری نا مون آ دننگ کن چست کروک آ چندی گام گیج آتے مون آ تخسا گیشتر مالیاتی آسراتی و آزادانہ پالیسی نظام ءِ تالان کرے ہرا معیشت نا غٹ بشخ آتے ٹی ہندی و درملکی گمانی زرکار آتے کن ملک ءِ پرکشش ہند اس جوڑ کننگ کن جوڑ کننگانے۔ اوپارے کہ گڑاس معاملہ غاتے ایسر کننگ کن کوشست آک جاری ءُ ہرافتیان مستین اٹی زرکاری نا ترند ترشونداری و کاروباری برادری نا پت بحال کننگ نا کسر اٹ اڑاند ودی مس ۔ سیکرٹری زرکاری بورڈ وزیراعظم ءِ ملک اٹی کاروبار کننگ اٹی آسانی ودی کننگ کن چست کروک آ گام گیج آتیان ہم معلومدار کرے۔ سی پیک نا رداٹ خصوصی اقتصادی زون تا جوڑ کننگ آ پیش رفت نا ہم جاچ ءِ ہلنگا۔ وزیراعظم کاروبار اٹی آسراتی تننگ و معیشت نا چندی بشخ آتے ٹی زرکاری ءِ اتنگ نا بابت زرکاری بورڈ انا کوشست آتا ستاءِ کرے۔ اوبنجائی و صوبائی حکومت ، وزارت، درملکی مشن و ایلو تعلقدار حلقہ غاتا نیام اٹ کمکاری ءِ سوگوی تننگ نا گرج آ زور شاغا تانکہ کاروباری برادری ءِ زیات آن زیات آسراتی مرے و ملک اٹی زرکاری نا ترند ترنموٹی اڑاندآک مر مریر۔
