اسلام آباد۔ 24جولائی (اے پی پی) بنجائی وزیر اطلاعات ، نشریات ، قومی تاریخ و ادبی میرات سید علی ظفر پارینے کہ نگران بنجائی و صوبائی حکومت، الیکشن کمیشن آف پاکستان و تعلقدار ادارہ غاک پرامن و سازگار گچین کاری چاگڑد نا فراوانی کن غٹ ممکنہ گام گیج کرینو، (اینو) چارشنبے نادے الس پورو پت اتون تینا وونٹ انا حق ءِ کاریم اٹ اتیر، میڈیا نا ہم منت واری ءِ ہرفنہ کہ او چندی سیاسی جماعت آتا نقطہ نظر ءِ الس اسکان سرکرے و وونٹ انا اہمیت ءِ تالان کرے۔ سے شنبے نادے تینا اسہ کلہو اسے ٹی بنجائی وزیر پارے کہ گچین کاری تیٹی بشخ ہلوک آ غٹ اومیت دار و سیاسی جماعت آتا منت واری ءِ ہرفنہ کہ اوتینا پبی شرکت اٹ ملک اٹی جمہوریت و جمہوری عمل ءِ سوگو کریر ۔ اوپارے کہ ہرااومیت دار ءِ کٹوئی ءِ اونا فیصلہ بیرہ پگہ نا دے وونٹ آتا دوٹی ءِ۔ نگران حکومت ءِ داہیت اتون ہچ ءُ غرض اس اف کہ ہرا جماعت الیکشن ءِ کٹسا حکومت جوڑ کیک، ننا مسخت بیرہ دادے کہ نم 25جولائی آ آجوئی اتون تینا وونٹ انا حق ءِ کاریم اٹ اتنگ کیرے۔ اوپارے کہ اینو نا دے گچین کاری مہم نا وقفہ نا مسخت دادے کہ الس ہراجتا آراء تے بنفے و سیاسی جماعت آتا منشور آتے ہرا او تسلی اٹ سوچ و بچار کیر و بے خوف و خلیس پگہ نادے تینا وونٹ انا حق انا قومی فرضءِ ادا کیر۔ اوپارے کہ (اینو) چارشنبے نادے الس پورو پت اتون تینا وونٹ انا حق ءِ کاریم اٹ اتیر ، ببو نن غٹ اواری اٹ پاکستان نا پن ءِ مچ آ دنیا ٹی روشن کین۔
