اسلام آباد۔ 23جولائی (اے پی پی) نگران وزیراعظم جسٹس (ر) ناصر الملک دوشنبے نادے پاکستان مانومنٹ اٹی تاریخی اہمیت تخوک اِراونٹیج کارتا نمائش نا بناءِ کرے ہرا ملک انا سروک ءِ مملکت و حکومت و ساہت بہ ساہت دورہ کروک آ پنی آ شخصیت آتا استعمال اٹ ئسر ۔ رولز رائس سلور شیڈ و مرسڈیز پل مین ایس 600 وزیراعظم آفس نا کنڈآن پاکستان مانومنٹ میوزیم ءِ ٹیکی نا وڑاٹ پیش کننگانو و الس کن اوفتا نمائش ءِ کننگانے۔ وزیراعظم جسٹس (ر) ناصر الملک دا تاریخی کارتا نیلامی نا بحالی و رکھ انا فیصلہ ءِ کرسا اوفتے میوزیم اٹ تخنگ نا پرمان تس وخت اس کہ داکان مست اوفتے نیلام کننگ نا سلاہ پیش کننگاسس۔ عجائب گھر انا دورہ ٹی وزیراعظم اومیت ظاہر کرے کہ داکارتا نمائش آن ورناک و بروک آ نسل آتے پاکستان نا تاریخ و دورہ کروک آ جہانی شخصیت آتا مہمان نوازی نا روایت نا بارواٹ معلومداری مریک۔ وزیراعظم میوزیم نا دورہ ءِ کرے و نٹیج کارتیٹی بھاز است خواہی ہلک۔ وزیراعظم اوفتے قومی تاریخ نا اسہ اہم ءُ جزو اس گوندا۔ اوکان پد ایگزیکٹو ڈائریکٹر لوک ورثہ شاہیرہ شاہد ’’اے پی پی‘‘ ءِ پارے کہ حکاس پرائیویٹ لمیٹڈ گراں قدر قومی میرات ءِ رکھ فراوان کننگ نا جوزہ نا رداٹ داکارتے رضاکارانہ وڑاٹ بحال کرینے۔ اوداپت انا درشانی ءِ کرے کہ تاریخی میرات تخوک داکارک دا منفرد انگا میوزیم اٹ وزیٹرآتا چکار محور مریک۔ مرسڈیز پل مین ایس 600 کار 1970 ء ٹی جوڑ کننگا و حکومت پاکستان اودے ہموسال درآمد کرے و ہمووخت انا صدر جنرل یحییٰ خان و وزیراعظم ذوالفقار علی بھٹو نا استعمال اٹ ئسر۔ داکار ءِ کاریم اٹ اتوک آ نمان شخصیت آک درملکی شخصیت آتے ٹی فلسطین نا صدر یاسر عرفات ، مصر انا صدر انورسادات، لیبیا نا صدر کرنل معمر قذافی ، سعودی عرب نا شاہ فیصل بن عبدالعزیز و ایلو پنی جہانی راہشونک اوار ءُ۔ رولز رائس سلور شیڈ و1976ء ٹی تیار کننگا و داشاہ خالد بن عبدالعزیز ہمووخت انا وزیراعظم ذوالفقار علی بھٹو ءِ ٹیکی نا وڑاٹ پیش کریسس۔ داہمووخت انا وزیراعظم بے نظیر بھٹو ، پرنس کریم آغاخان ، سعودی عرب نا شاہ خالد بن عبدالعزیز ، یو اے ای نا راہشون شیخ سلطان بن النہیان ، شہزادی ڈیانا، باکسر محمد علی و چین، جاپان ، تھائی لینڈ ، بنگلہ دیش و نیپال نا راہشون تا استعمال اٹی ئسک۔ داکان مست وزیراعظم آفس داکارتے 22جون آ نیلام کننگ نا ارادہ کریسس ولے ہراتم دامعاملہ ءِ نگران وزیراعظم نا علم اٹ اتنگا تو اونیلامی ءِ منسوخ کرسا پارت کرے کہ دا تاریخی کارتے میوزیم اٹ تخنگے۔ یات سلے کہ کارتا شونکیک حارث عزیز، کریم یوسف و معین عباس دا معاملہ ءِ تالان کننگ اٹ نمان کڑد ادا کریر و 19 جون آ کابینہ سیکرٹری ءِ نیلامی نا منسوخی کن مراسلہ ہم گدریفیسر۔
