اسلام آباد۔ 23جولائی (اے پی پی) پاکستان اٹی جاپان نا سفیر ہیروشی اینو ماتا پارینے کہ پاکستان و جاپان روایتی گچین تعلقداری و سنگتی نا بندھن اٹ تفوک ءُ و وخت اتون اوار اوار ہڑتوم آ ملک آتا نیام اٹ سنگتی پین سوگو مننگ ءِ،نائن الیون آن پد پاکستان دہشت گردی نا عفریت نا نرینہ غامبار مقابلہ ءِ کننگ ءِ و دہشت گردی نا برخلاف جنگ اٹی پاکستان بھلو قربانی تسنے۔ ریڈیو پاکستان ءِ خصوصی انٹرویو ترسا اوپارے کہ ہڑتوم آ ملک آتا نیام اٹ واپارنا ساڑی آ کچ اِرا ارب ڈالر نا خڑک ءِ ہراٹی پین ودکی کننگ نا گرج ءِ ، جاپانی زرکارآک مہالوآن آٹوموبائل، موٹرسائیکل، فارماسوٹیکل و ایلو اہم بشخ آتیٹی زرکاری نا بناءِ کرینو۔ جاپانی کمپنیک پاکستان اٹی توانائی نا بشخ اٹی زرکاری ٹی است خواہی ہلنگ ءُ، جاپان دیر آن بجلی نا پیداوار اٹی پاکستان نا کمک ءِ ہم کرینے وخت اس کہ داسہ اونا ملک صاف و ایلو توانائی نا ڈٹ آتے ٹی پاکستان تون کمک کننگ ءِ۔
