کوئٹہ ۔21جولا ئی( اے پی پی )ادارکی سر وزیر بلوچستان علاؤالدین مری ءُُ ادارکی سر وزیر پنجاب پروفیسرحسن عسکری ءِ میان ءَ ادا بوتگیں گند ءُُ نند ءَ اے جزم ءِ درشان کنگ بوتگ کہ ادارکی حکومت ساپ ءُُ پلگاریں گچینکاری ءِ برجم داری ءَ سدکی جوڈ کن انت ءُُ دراھیں سیاسی گلاں ءُُ امیتوارءَ را گچینکاری ءِ تہ بہر زورگ ءِ ھاترا یک وڈیں موہ پھجارگ بیت۔ادارکی حکومت ءَ راج ءَ چہ دزبندی کت کہ کجام ھم منفی پروپیگنڈہ ءِ ابید وتی ووٹ ءَ کارمرز کن انت۔اے درگت ءَ ادارکی حکومت ءَ را حاصل واک ءِ ردا گچینکاری ءِ برجمی ءِ ھوار دگہ کار آنی سرا ھیال ریچی کنگ بوتگ،ادارکی سر وزیراں کے پی کے ءُُ بلوچستان ءِ تہ ناشرکاری ءِ وئیلانی ایراد گپتگ ءُُ گوشت کہ ملک دژمنیں تاکت گچینکاری ءِ پر امنیں ماحول ءَ برجمینگ ءَ بے سوب کنگ ءِ کوشست کنگ ات بلے سیکورٹی ادارگ مستعد بوان ءَ منفی قوتانی لگوریں جزم ءَ را بے سوب کنگ انت ءُُ سرجمیں ملک ءَ پرامنیں گچینکاری ءِ برجمینگ ءَ سدکی جوڈ کنگ ایں۔اے ساعت ءَ سر وزیر بلوچستان ءُُ سر وزیر پنجاب ءِ دلگوشی حکومت ءِ پنجاب ءِ نیمگا چہ دل ءِ نادراہی ءِ ادارگ ءِ جوڈ کنگ ءِ منصوبگ ءِ نیمگا کنان ءَ گوشت کہ اے منصوبگ مہتل انت ایشی ءِ سرا زوتاں زوت وڈ ءُُ پیم ءِ ضلورت انت۔سر وزیر پنجاب ءَ اے ھوالہ ءَ سدکی دات کہ آں جہد کن انت کہ اے منصوبگ ءِ سرا کار زوت بناء بیت۔اے ھوالہ ءَ گوں آں محکمہ جان سلامتی پنجاب ءُُ دگہ ہمگرنچیں ادارگ ءَ پنت دنت ۔آہاں گیش گوشت کہ پنجاب ءِ تعلیمی ادارگاں بلوچستان ءِ گیشاں چہ گیش نودربراں را وانگی ءِ موہ پھجارگ بنت۔ادارکی صوبائی وزیر پنجاب ضیا ایچ رضوی ، ادارکی صوبائی وزراء بلوچستان امام بخش بلوچ،سلام خان ءُُ چیف سیکرٹری پنجاب اکبر حسین درانی ھم گند ءُُ نند ءِ تہ ساڑی ات۔پدا ادارکی سر وزیر پنجاب ءِ شرپ ءَ سر وزیر بلوچستان ءِ نیمگا چہ نیم روچ ءِ نان ھم داتگ۔
