اقوام متحدہ ٹی پاکستان نا سفیر نا جہانی ادارہ نا اکنامک اینڈ سوشل کونسل نا بڑزکو کہولی سیاسی فورم اٹی تران

نیویارک۔ 20 جولائی (اے پی پی) پاکستان پارینے کہ جہانی کہول آ بھلو فنڈ اس و المی وسیلہ غاتے متحرک کننگ اٹ بے سہبی آن پائیدار و شونداری نا ہدف آتیان گڑاسے آ عملدرآمد اٹ پیش رفت زہمی مسنے وخت اس کہ پاکستان غٹ ہدف آتیا بریبری چکار کننگ ءِ المی جوڑ کننگ نا خواست ہم کرینے۔ اقوام متحدہ ٹی پاکستان نا سفیر ملیحہ لودھی جہانی ادارہ نا اکنامک اینڈ سوشل کونسل (ای سی او ایس او سی) ٹی اڈ ہلوک آ بڑزکو کہولی سیاسی فورم اٹی پارے کہ داسہ وخت اس کہ مچ آ دنیا ٹی براہ راست درملکی زرکاری ٹی کمتی بسنے و گدرینگوک آ سال ہم براہ راست درملکی زرکاری ٹی 23 درسد کمتی مس۔ اواقوام متحدہ نا شونداری ایجنڈا 2030 کن پیسہ غاتا فراوانی نا چرجوئی ٹی بڑزکو کہولی دیوان بٹنگ انگ نا سیکرٹری جنرل انتونیو گوترش نا پڑو نا ستاءِ کرے۔ تینا تران اٹی ملیحہ لودھی غٹ پالیسی ساز آتیا زور شاغاکہ او داہیت ءِ ہرحال اٹ المی جوڑ کیر کہ غٹ شونداری ہدف آتیا اسہ وڑچکار کننگے۔ اوپارے کہ ہدف آتیان شون ہلوک و بے شون ہلوک ملک آتیٹی الس نا ویل آک ایسر مسرہ و گرج آک پورو مریرہ ہنداخاطرآن اسہ ملک اس ہم ہدف آتے پورو کننگ اٹ بایدے پد سلپ۔ اوتران اٹی چندی ہدف آتا بارواٹ پیش رفت و پاکستان اٹی کروک آ داوخت اسکان گام گیج آتا بارواٹ ہم پارے۔