لس گچین کاری تیٹی ٹرن آؤٹ ءِ ودفنگ کن الیکشن کمیشن نا پرنٹ و الیکٹرانک میڈیا تون اوار پین ذریعہ اٹ معلومداری مہم پبی وڑاٹ برجا
قومی اسمبلی کن سبز، صوبائی اسمبلی تا اومیت دار آتے کن پیئن ءُ بیلٹ پیپر مریک
اسلام آباد۔ 20 جولائی (اے پی پی)الیکشن کمیشن نا کنڈآن بروک آ لس گچین کاری تیٹی ٹرن آؤٹ ءِ ودفنگ کن پرنٹ و الیکٹرانک میڈیا تون اوار پین ذریعہ اٹ معلومداری مہم پبی وڑاٹ برجاءِ وخت اس کہ داڑتون اوار اوار ووٹر آتے کن راہشون اصول ہم جاری کرینے ہرافتا رداٹ پولنگ نا دے اصل شناختی کارڈ ءِ تین تون اتنگ المی گوندنگانے ، پولنگ نا وخت ءُ پاس سہب انا 8 بجہ غان شام انا 6 بجہ اسکان تخنگانے ۔ الیکشن کمیشن نا رداٹ پولنگ عملہ تون ساڑی ووٹر فہرست آتیٹی ووٹرآتا عکس ہم مریک، پولنگ سہب انا 8 بجہ غان شام انا 6 بجہ اسکان بیدس وقفہ نا برجاسلک۔ قومی اسمبلی کن سبز بیلٹ پیپر وخت اس کہ صوبائی اسمبلی تا اومیت دار آتے کن پیئن ءُ بیلٹ پیپرز مریک۔ قومی و صوبائی اسمبلی تے کن جتا جتا ءُ بیلٹ باکس پولنگ اسٹیشن و بوتھ آ تخنگک۔ ہر پولنگ اسٹیشن آ 4فوجی کارندہ تعینات مریک ہرافتیان 2پولنگ اسٹیشن نا تہٹی فرض ءِ سرانجام ایترہ ، حساس پولنگ اسٹیشن آتیا سی سی ٹی وی کیمرہ خلنگ انگ ءِ ، پولنگ نا گڑا و گڑاس علاقہ غاتیٹی بیلٹ پیپرنا ترسیل ہم جاری ءِ ، نتیجہ غاتا بروخت ترسیل کن رزلٹ ٹرانسمیشن سسٹم درستی راستی کرفنگانے ہرانا کمک اٹ پولنگ نا عملہ تینا موبائل فون اٹی ایپلیکیشن نا کمک اٹ نتیجہ غاتے براہ راست الیکشن کمیشن ءِ راہی کننگ کیرہ۔ ووٹرآک 8300 آ تینا قومی شناختی کارڈ نمبر ءِ گدریفسا تینا وونٹ ءِ پک و شماریاتی بلاک نا بابت معلومداری ہلنگ کیرہ۔ الیکشن کمیشن گچین کاری شیڈول نا جاری کننگ آن مست زالبول نا زیات آن زیات گچین کاری عمل اٹی ساڑی مننگ ءِ المی جوڑ کننگ کن اہم گام گیج چست کے۔ اوفتے نادرا نا کنڈآن مفت شناختی کارڈ جاری کننگا۔ داکان بیدس گچین کاری کانود 2017 ء ٹی 5 درسد عمومی نشست آتیا ٹکٹ زالبول ءِ تننگ المی گوندنگاسس اوکان پد اسہ بھلو کچ اسے ٹی زالبول ہم گچین کاری عمل اٹ شریک ءِ۔ الیکشن کمیشن نا کنڈآن الیکٹرانک و پرنٹ میڈیا آ پبی معلومداری مہم جاری ءِ وخت اس کہ پرائیویٹ ٹی وی چینل آتا کنڈآن رضاکارانہ وڑاٹ اشتہار ہم چلیفنگ انگ ءِ کہ ووٹرآک زیات آن زیات تینا وونٹ انا حق ءِ کاریم اٹ اتنگ کیر۔
