دوشنبے۔20جون (اے پی پی) ملک ءِ صدر ممنون حسین ءَ سرجمیں دنیاءِ تہا آپءِ آسراتی ءِ جیڑھءُ جنجالاں گرءُ دار کنگءِ ھاترءَ مزن تک ءِ کمک ءُ شریداریءَ را گیش کنگءِ ضلورتءِ سرءَ زور پِر داتگءُ گشتگ کہ میاں اوستمانی جیڑھءُ جنجالانی سرءَ وتی کستءُ کینگءَ را یل کنگ ءُ نیزگاری ، جانءُ سلامتی ءِ معیارءِ تہا گہتری ءُ مھکمیں دیمروئی ءِ ھاترءَ کوشست کنگ بہ بیت۔ پاکستان جامع پالیسی ءِ ردءَ آپی آسراتی ءِ گہتریں نظام ءَ ھوار دمگی ءُ میاں اوستمانی کمک ءِ وسیلگءَ وتی ادارگ آنی صلاحیت ءِ تہا گیشی ءُ مزنیں جیڑھءُ جنجالاں گر ءُ دار کنگءِ ھاترءَ حکمت عملیءِ سرءَ کار کنگءَ اِنت۔ آئیءَ اے گپ چارشمبےءِ روچءَ دوشنبے ءَ ’’ آپی آسراتی ءُ مھکمیں دیمروئی ‘‘ ءِ سرھال ءِ سرءَ مزن تک ءِ دو روچی میاں اوستمانی کانفرنس ءِ بنگیجی نشستءَ گوں تران کنگءَ بوتگ۔ تاجکستان ءِ صدر امام علی رحمان ءَ کانفرنس ءَ گوں بنگیجی تران کتگ۔ کانفرنس ءَ چہ ترکمانستان ءِ صدر، اوگانستان ءِ چیف ایگزیکٹو ءُ درملکی ڈل ءِ دگہ سروکاں ھم تران کتگ۔
