وزارت داخلہ نا نیشنل ایکشن پلان آ عملدرآمد نا بابت میڈیا ناگڑاس بشخ آتیٹی شینک مروک آ خبرنا سختی اٹ تردید، خبر پوروی وڑاٹ بے بنداو ئِ، میڈیا حساس قومی سلامتی معاملہ غاتیا غیر مصدقہ مواد آتا شینک کننگ آن پاناد کے، ترجمان بنجائی وزارت داخلہ
اسلام آباد۔ 27 دسمبر (اے پی پی) وزارت داخلہ نیشنل ایکشن پلان آ عملدرآمد نا بابت میڈیانا گڑاس بشخ آتیٹی شینک مروک آ خبر نا سختی اٹ تردید ئِ کرسا اودے پورووڑاٹ بے بنداو گوندانے، میڈیا حساس قومی سلامتی معاملہ غاتیا غیر مصدقہ مواد آتا شینک آن پاناد کے۔ سے شنبے آ داڑے جاری بیان اسے ٹی ترجمان وزارت داخلہ صفا کرے کہ دُنو رپورٹ اس نہ تو وزارت داخلہ جاری کرینے و نہ ہی وزیر داخلہ اونا منظوری ئِ تسنے دُن کہ خبر اٹی غلط وڑاٹ پاننگانے۔ ترجمان داہیت آ است ہسونی نا درشانی ئِ کرے کہ ذریعہ نا تصدیق و تعلقدار کمامدارآتیان حق دوئی کننگ آن بیدس اسہ اہم ئُ قومی سلامتی معاملہ سے آ بے بنداو خبر شینک کننگا و وزیرداخلہ و وزارت داخلہ آن اودے بالکل غلط وڑاٹ منسوب کننگا تانکہ غیر مصدقہ دستاویز آتے معتبر جوڑ کننگ مرے۔ ہنداوڑنا غیر زموارانہ رپورٹنگ آن نہ صرف الس گمراہ مریک بلکن داصحافت نا اخلاق و اصول آتا ہم برخلاف ئِ۔ ترجمان میڈیا آ زورشاغاکہ او حساس قومی سلامتی معاملہ غاتیا غیر مصدقہ مواد آتا شینک کننگ آن پاناد کیر۔ ترجمان پارے کہ نیشنل ایکشن پلان یا ہراہم سلامتی نا بابت معاملہ غا مواد اس وزارت داخلہ نا ترجمان نا دفتر آن فراوان کننگک ۔
