صدر مملکت ممنون حسین نا گورنر ہاﺅس کوئٹہ ٹی میڈیا نا نمائندہ غاتون ہیت وگپ

کوئٹہ۔ 27 دسمبر (اے پی پی) صدر مملکت ممنون حسین پارینے کہ بلوچستان تون اوار مچ آ ملک اٹی امن و ایمنی نا حالیت آتیٹی نمان گچینی بسنے، نیشنل ایکشن پلان آ گچین عملدرآمد و کانود نافذ کروک آ ادارہ غاتا تین پہ تینی کمکاری نا بدولت دہشت گردی نا واقعہ غاتیٹی خاطرخواہ کمتی بسنے، حکومت نا کارکڑد انا ستائِ جہانی ادارہ غاک کننگ ئُ ۔اوداہیت ئِ دوشنبے آ داڑے گورنر ہاﺅس اٹی میڈیا نا نمائندہ غاتون ہیت وگپ کرسا پارے۔ داوخت آ گورنر بلوچستان محمد خان اچکزئی، باسک قومی اسمبلی خلیل جارج ، صوبائی وزراءعبدالرحیم زیارتوال ، میر مجیب الرحمان محمد حسنی و سردار رضابڑیچ ہم ساڑی ئسر۔ صدر مملکت ممنون حسین پارے کہ باصلاحیت فنکار، ادیب، شاعرآتا مالی کمکاری کن انڈومنٹ فنڈ اس اڈتننگانے و بلوچستان نا ضرورت مندادیب، فنکار و شاعرآک ہم انڈومنٹ فنڈ آن فائدہ ہرفنگ کیرہ۔