یمن نا سفیر محمد مطاہر العشبی نا منیجنگ ڈائریکٹر ’’اے پی پی‘‘ مسعود احمد ملک تون ہیت وگپ

یمن نا حکومت حوثی ملیشیاء تون امن مذاکرات کن مخلصانہ کوشست کننگ ءِ، پاکستان کنا ارٹ میکو اُراءِ ، پاکستانیک بھاز مہمان نواز ءُ
اسلام آباد۔ 08 مئی (اے پی پی) پاکستان اٹی جمہوریہ یمن نا سفیر محمد مطاہر العشبی پارینے کہ یمن نا حکومت ملک اٹی خونریزی ءِ چٹفنگ و حالیت آتے معمول آ اتنگ نا غرض اٹ حوثی ملیشیا ء تون امن مذاکرات کن مخلصانہ کوشست کننگ ءِ۔ داہیت ءِ او سے شنبے نادے قومی خبررساں ادارہ ایسوسی ایٹڈ پریس آف پاکستان (اے پی پی) ہیڈکوارٹرز اسلام آباد نا دورہ نا وخت آ منیجنگ ڈائریکٹر اے پی پی مسعود احمد ملک تون ہیت وگپ کرسا پارے۔ ڈائریکٹر ڈپلومیٹک افیئرز اے پی پی ہم داوخت آ ساڑی ئس۔ سفیر مطاہرالعشبی پارے کہ یمن نا حکومت خونریزی نا چٹفنگ آ باور کیک ولے حوثی باغیک ننا ہیت ءِ خف توریرہ و نئے دا ویل ءِ ایسر کننگ اٹ است خواہی نشان تننگ ءُ۔ اسہ سوج اسے نا ورندی ءِ ترسا سفیر پارے کہ ننا ملک جہانی سیاست نا بنجاء جوڑ مسنے انتئے کہ ایلو کیہی ملک آک حوثی ملیشیا نا ویل انا بابت مثبت یا منفی کڑد ادا کننگ ءُ ہرانا سوب دا ویل ءِ ایسر کننگ مشکل مسنے۔ اسہ پین سوج اسے نا ورندی ءِ ترسا اوپارے کہ پاکستان کنا ارٹ میکو اُرا ءِ انتئے کہ ای داکان مست ہم پاکستان اٹی زمواری تے پورو کرینٹ۔ اوپارے کہ ہڑتوم آ ملک آتا الس اٹی بے کچ مماثلت ارے وخت اس کہ پاکستانیک بھاز مہمان نواز ءُ۔ پاکستانی حکومت و الس مدام یمن کن ہمدردی و جوزہ خیر سگالی نا درشانی ءِ کرینو ، نن ہم پاکستان اٹی امن ءِ ہُننگ خوانہ ۔ سفیر ءِ معلومدار کننگاکہ پاکستان نا قومی خبررساں ادارہ اے پی پی و نیشنل نیوز ایجنسی یمن ’صبا‘ نا نیام اٹ خبر آتا تبادلہ نا پروٹوکول آ دستخط مسنے ولے داڑآ عملدرآمد کننگپک۔ سفیر پارے کہ خبر رساں ادارہ ’صبا‘ نا انتظام ءِ باغیک تینا دوٹی کرینو و یمن نا حکومت پوسکن آ سیٹ اپ نا جوڑ کننگ آ کاریم کننگ ءِ۔ اوباوری ترفے کہ ہڑتوم آ نیوز ایجنسی تا نیام اٹ کمکاری ءِ زوت بحال کننگک۔ ایم ڈی مسعود ملک یمنی سفیر ءِ اے پی پی نا کنڈآن خبررساں ادارہ غاتا جہانی کانفرنس اٹی بشخ ہلنگ نا سلہ خلک ہرا13مئی آن اسلام آباد اٹی بناء کننگ ءِ۔ اوسلہ ءِ امنا کرسا پارے کہ کانفرنس اٹی او تینا ملک انا نمائندگی ءِ کیک۔ داوخت آ ایم ڈی مسعود ملک یمن نا سفیر ءِ اے پی پی نا یات گاری شیلڈ اس پیش کرے۔