پاکستان ءُ کروشیا ءِ نیام ءَ سیاسی ءُ اقتصادی سیادی ءَ را گیش تیز کنگ ءِ واستہ ٹھوس گامگیج زورگ ءِ سر ءَ تپاک کنگ بوتگ، نائب مزن وزیر اسحاق ڈار ءُ کروشیا ءِ دری کارانی وزیر ڈاکٹر گورڈن گرلیچ ریڈمین  ءِ یکجائی پریس کانفرنس

اسلام آباد۔9جولائی  (اے پی پی): پاکستان ءُ کروشیا ءِ نیام ءَ اے گپ ءِ سر ءَ تپاک کنگ بوتگ کہ دوئیں ملک آنی نیام ءَ سیاسی ءُ اقتصادی سیادی ءَ را گیش ترند کنگ ءِ واستہ ٹھوس گامگیج چست کنگ بیت۔ دوئیں ملک آنی تہ ءَ وت مہ وتی مفاد ءِ بازیں پڑ آنی تہ ءَ کمک ءَ را گیش کنگ ءِ سر ءَ تپاک کنگ بوتگ، ایشی ءِ تہ ءَ تجارت، سرمایہ کاری، بنیاتی ڈھانچہ ءُ ویزا ءِ آسراتی ھوار اَنت۔ اے تپاکی ادا نائب مزن وزیر ءُ دری کارانی وزیر سینیٹر محمد اسحاق ڈار ءُ کروشیا ءِ تر ءُ تاب کنوکیں درئی کار ءُ یورپی کارانی وزیر ڈاکٹر گورڈن گرلیچ ریڈمین ءِ نیام ءَ ڈل ءِ تک ءِ گپ ءُ تران ءِ ساھت ءَ بوتگ۔ یکجائی پریس کانفرنس ءَ گوں گشتانک دیان ءَ نائب مزن وزیر سینیٹر محمد اسحاق ڈار ءَ گوشت کہ دوئیں راہشون آں پاکستان ءُ کروشیا ءِ سیادی آنی سرجمیں تک ءُ پھنات آنی سر ءَ چار ءُ تپاسی کتگ ءُ سیاسی ءُ اقتصادی سیادی ءَ را گیش مھکم کنگ ءِ واستہ گامگیج کنگ ءِ سر ءَ تپاک کتگ۔ آئی ءَ گوشت کہ دوئیں ملک وت مہ وتی دلچسپی ءِ توامیں شوبگ آنی تہ ءَ کمک ءَ را گیش کن اَنت، ایشی ءِ تہ ءَ تجارت، سرمایہ کاری، دیمروئی، کشت ءُ کشاری، کارکن آنی نقل و حرکت، ویزا ءِ آسراتی، وانگ ءُ زانگ، دفاع، موسمی مٹ ءُ بدلی، سیل ءُ سواد، بنیاتی ڈھانچہ، انفارمیشن ٹیکنالوجی ءُ بندرگاہ ءِ کمک ھوار اَنت۔ اے کروشیا ءِ دری کارانی وزیر ءِ پاکستان ءِ اولی سرکاری تر ءُ تاب اِنت کہ ایشی ءَ چہ دوئیں ملک آنی نیام ءَ سفارتی سیادی آنی راجدپتر ءِ نوکیں باب ءِ بندات اِنت۔ نائب مزن وزیر ءَ گوشت کہ دو نیمگی تجارت انگت ءَ وتی حقیقی توانائی ءَ چہ کم انت، بلے تجارتی کساس ءِ تہ ءَ گیشی ءِ رجحان است انت۔ آئی ءَ گوشت کہ دوئیں ملک آنی نیام ءَ اقتصادی سیادی آناں دوبر چالو کنگ ءِ سر ءَ تپاک کنگ بوتگ، ایشی ءِ تہ ءَ وت مہ وتی سیت ءِ واستہ کاروباری رابطہ آناں دیمروئی دیگ ھم ھوار اِنت۔ آئی ءَ گوشت کہ دوئیں ملک آنی جندی شوبگ ءُ کاروباری برات آناں نزیک کنگ ءِ واستہ آیوکیں وھد ءَ بزنس ٹو بزنس ٹریڈ فورم ءِ برجم دارگ ءِ منصوبگ ءِ سر ءَ ھم ھیال ءُ لیکہ کنگ بوت۔ نائب مزن وزیر ءَ گوشت کہ دوئیں نیمگ آنی نیمگ ءَ دو نیمگی سیاسی شور ءُ سلاھ آنی ھوالگ ءَ تپاکی نامہ ءَ را سرجمی ءَ کارمرد کنگ ءِ پیسلہ کنگ بوتگ، وھدیکہ اے شور ءُ سلاھ آنی اولی دور اے سال یا 2027ءِ بندات ءَ کنگ بوت کنت۔ اے وھد ءَ پاکستانی درخواست گزاراں ویزہ پروسیسنگ ءِ واستہ ایران ءَ روگی انت۔ کروشیا ءِ دری کارانی وزیر ءَ گوشت کہ کروشیا مردم آنی نیام ءَ رابطہ آناں سک باز ارزشت دنت ءُ لوٹ ایت کہ پاکستانی شہری پاکستان ءَ ویزہ ءِ درخواست جم کنگ ءِ موہ ءَ بہ دار اَنت تانکہ آھاں درملک ءَ تر ءُ تاب کنگ ءِ ضلورت مہ بیت۔ آئی ءَ گوشت کہ کروشیا زوت اے آسراتی ءِ جوڑ کنگ ءِ واھشت مند اِنت۔ نائب مزن وزیر ءَ انسانی سوداگری ءُ ناجائزیں ہجرت ءِ ھلاسی ءِ ضلورت ءِ سر ءَ زور پر دیگ ءِ ساھت ءَ گوشت کہ ایمن، منظم ءُ کانودی میکانزم ءِ وسیلگ ءَ موہ پجارینگ المی اِنت تانکہ مہاجر آنی ھک ءُ جان سلامتی ءِ رکھینگ بہ بیت ءُ ناجائزیں اسمگلنگ نیٹ ورک آناں ھلاس کنگ بہ بیت۔ آئی ءَ دوئیں ملک آنی اسٹریٹجک جغرافیائی جاہ ءِ حوالہ ءَ کروشیا ءِ ڈل ءَ را کراچی بندرگاہ ءِ گنجائش، آسراتی ءُ رابطہ ءِ بابت ءَ سرپد کت ءُ دوئیں ملک آنی بندرگاہ آنی نیام ءَ کمک ءِ ھوالگ ءَ گپ ءُ تران بندات کت۔ گپ ءُ تران ءِ ساھت ءَ نائب مزن وزیر ءَ کروشیا ءِ ڈل ءَ را جموں ءُ کشمیر ءُ غزہ ءِ نیام ءَ دیریں جیڈھ ءِ تہ ءَ برجاھیں جاور ھال آنی بابت ءَ سرپد کت ءُ نیویارک ءَ آیوکیں اقوام متحدہ ءِ جنرل اسمبلی ءِ دیوان ءَ امن ءِ کوشست آناں پدا چالو کنگ ءِ سوج دات۔ آئی ءَ بھارت ءِ نیمگ ءَ سندھ ءِ آپانی معاہدے ءِ یک نیمگی معطل کنگ ءِ سر ءَ ھم جیڈھ ءِ درشانی کتگ ءُ دوستیں ملک آناں اپیل کتگ کہ آ آپ ءَ را سلاہ بند کنگ ءِ عمل ءَ را ھلاس کنگ ءِ تہ ءَ وتی کرد ءَ پیلو بہ کن اَنت۔ آئی ءَ کروشیا ءِ ڈل ءَ را اوگانستان ءَ چہ کار کنوکیں ناشرکاریں نیٹ ورک آنی دیم ءَ سیکورٹی چیلنج آنی بابت ءَ ھم سرپدی دات کہ ایشی ءِ تہ ءَ ٹی ٹی پی ءُ بی ایل اے ھوار اَنت۔ آئی ءَ اے گپ ءِ سر ءَ زور پر دات کہ اوگان طالبان ءِ سرکار وتی میاں اوستمانی زمہ واریانی سر ءَ عمل بہ کنت ءُ اوگان سرزمین ءَ را اے موہ مہ دنت کہ آ دگہ ھچ ملک ھاسیں رنگ ءَ پاکستان ءِ ھلاپ ءَ ناشرکاری ءِ واستہ کارمرد کنگ بہ بیت۔ دوئیں نیمگ ءَ یوکرین ءِ جاور ھال آنی سر ءَ ھم گپ ءُ تران کنگ بوتگ ءُ جیڈھ آناں میاں اوستمانی کانود ءِ رد ءَ گیش ءُ گیوار کنگ ءِ ضلورت ءِ سر ءَ زور پر داتگ۔ نائب مزن وزیر ءَ گوشت کہ پاکستان ءِ واستہ یورپی یونین ءِ جی ایس پی پلس اسکیم پاکستان ءُ یورپی یونین ءِ اقتصادی کمک ءِ یک ھاسیں کنٹگ انت۔ آئی ءَ گوشت کہ چیا کہ نوکیں جی ایس پی پلس رژیم یک جنوری 2027ءَ چہ کارمرد بوھگ ءَ اِنت، پاکستان ءَ 2027ءِ بندات ءَ دوبر درخواست دیگ ءِ تیاری ءِ عمل بندات کتگ۔کروشیا ءِ دری کارانی وزیر ءَ گوشت کہ جی ایس پی پلس پاکستان ءِ جھان ءِ معیشت ءِ تہ ءَ یکجاھی ءِ واستہ یک اتپریرک ءِ کرد ءَ پیلو کنگ ءَ اِنت۔ آئی ءَ پاکستانی کمپنی آناں کروشیا ءَ سرمایہ کاری ءِ دعوت دات ءُ گوشت کہ کروشیا وتی جوانیں جغرافیائی جاہ ءِ سبب ءَ توانائی ءِ مرکز ءُ یورپی مارکیٹ ءِ پچیں دروازگ جوڑ بوتگ۔ آئی ءَ پاکستان ءَ کروشیائی کمپنی آنی دیریں وھد ءَ چہ ھست بوھگ ءِ ذکر کت ءُ امیت سہرا کت کہ دوائی، جان سلامتی، آئی ٹی ءُ سیل ءُ سواد ءِ شوبگ آنی تہ ءَ مارکیٹ ءِ تہ ءَ گیش ءُ گیوار بیت۔ آئی ءَ گوشت کہ 9 اسٹریٹجک بالی پٹ ءُ 6 مزنیں دریائی بندرگاہ آنی گوما کروشیا ءَ را میاں اوستمانی سفر ءُ تجارت ءِ واستہ ھم دروازگ جوڑ بوت کنت۔ آئی ءَ گوشت کہ میاں اوستمانی یورپ ءِ گوما کروشیا ءِ ریلوے رابطہ ءِ سبب ءَ مھکمیں ٹرانسپورٹ، توانائی ءُ ڈیجیٹل رابطہ کاری نیٹ ورک آناں دیمروئی دیگ بیت۔ دوئیں ملک آنی نیمگ ءَ کلیدی جھان ءِ جیڈھ آنی سر ءَ مھکمیں ھمگرنچی ءِ درشان کنگ ءُ کثیر جہتی نظام، اقوام متحدہ ءِ منشور ءُ جیڈھ آنی پرامن گیواری ءِ سر ءَ وتی عزم ءِ پدا پدر کنگ بوتگ۔ کروشیا ءِ دری کارانی وزیر ءَ اقوام متحدہ ءِ سلامتی کونسل ءِ تہا پاکستان ءِ فعالیں کرد ءِ توسیپ کت۔ آئی ءَ اے تر ءُ تاب ءَ را وش اتک کت ءُ انوگیں سفارتی کوشست آناں ساڑات۔ آئی ءَ گوشت کہ ما ھاسیں رنگ ءَ پاکستان ءِ سفارتی کوشست آناں ساڑاھیں ایشی ءِ آسر ءَ امریکہ ءُ ایران ءِ نیام ءَ جیڈھ ءِ ھلاسی ءِ واستہ اسلام آباد تپاکی نامہ جوڑ کنگ بوتگ۔ اسلام آباد ءَ را ”امن ءُ سفارتکاری ءِ شہر“ لیکگ ءَ کروشیا ءِ دری کارانی وزیر ءَ نائب مزن وزیر محمد اسحاق دار ءِ گرمیں وش آتک ءُ مہمانداری ءِ منت گپت۔ آئی ءَ امیت کت کہ آئی ءِ اے تر ءُ تاب دوئیں ملک آنی نیام ءَ سیادی آناں گیش مھکم کنگ، بیپار ءُ سرمایہ کاری ءِ تہ ءَ گیشی ءُ کمک ءِ نوکیں راہ آنی شوھازگ ءَ کمک رسیت۔ کروشیا ءِ دری کارانی وزیر ءَ نائب مزن وزیر سینیٹر محمد اسحاق ڈار ءَ را سرکاری دعوت ھم داتگ کہ آ آیوکیں سال ءِ جون ءِ گڈ ءَ کروشیا ءَ برجم دارگ بوھوکیں ڈوبروونیک فورم ءَ بھر زوری بہ کنت۔