اسلام آباد۔ 03 مئی (اے پی پی) وزیراعظم شاہد خاقان عباسی پارینے کہ پاکستان داسہ چیلنج آتیان پیش تمانے و ’’ایمر جنگ پاکستان‘‘ ملک انا گچین ساکھءِ جوڑ کننگ و شونداری نا اسہ تصور اس ئس، بدقسمتی اٹ گدرینگوک آ 15سال آن ننے دہشت گردی ، اقتصادی چیلنج و علاقائی ویل آتا مون تروکی ئس ولے اللہ نا فضل اٹ داسہ نن دا چیلنج آتیان پیش تمانن و ایمر جنگ پاکستان ننا برآمد آتا شونداری کن ننا وژن ءِ۔ او وزارت واپار نا کنڈآن اڈ ہلوک آ ایمر جنگ پاکستان نا دود آن تران کریکہ ۔ وزیراعظم پارے کہ اینو پاکستان نا برآمد آک جوان ءُ کنڈ اسے آروان ءُ ہرا ڈبل ڈیجٹ گروتھ اسکان سرمسنو۔ اقتصادی شونداری نا کچ 6 درسد اسکان سرمسنے، پیشن نا براہ راست زرکاری اسہ دہائی ٹی بڑزانگا کہول آٹی ءِ، چین پاکستان اقتصادی راہداری بے کچ المی انفراسٹرکچر نا موجب ءِ۔ اوپارے کہ حکومت انفراسٹرکچر نا ایلو بشخ آتے ٹی ہم زرکاری کننگ ءِ۔ بجلی و گیس انا بشخ آتیٹی کاختی و انفراسٹرکچر نا کمتی داسہ مستین نا ہیت آک ءُ۔ نن اسہ شون ہلوک ءُ پاکستان نا کنڈآہِننگ اُن۔ اوپارے کہ چندی ویل آتا مون ءِ توننگ آن پد داسہ پاکستان درملکی زرکارآتے کن پرکشش ملک اس جوڑ مرسا مون آ بننگ ءِ۔ ملک شونداری نا کسر آ روان ءِ و ڈیہہ نا رابطہ کن آسراتی ہم فراوان کننگ ءِ۔ اوپارے کہ ننا مسخت نیامی ایشیا، اوغانستان ، دیکی چین و ڈیہہ نا ایلو ملک آتے سمندر و جہانی منڈی تسکان بھلو کچ اسے آ رسینگ فراوان کننگ نا ءِ۔
