اسلام آباد۔ 03مئی (اے پی پی) وزیراعظم شاہد خاقان عباسی تون جمہوریہ ترکی نا چیف آف آرمی اسٹاف جنرل ہولوسی اکار پنچ شنبے نا دے داڑے وزیراعظم آفس اٹی اوڑدہی کرے۔ داوخت آ وزیر دفاع انجینئر خرم دستگیر خان ہم ساڑی ئس۔ جنرل اکار وزیراعظم شاہد خاقان عباسی کن ترک صدر رجب طیب اردوان نا کنڈآن نیک است خواہی تا کلہو ءِ سرکرے و ہڑتوم آ ملک آتا نیام اٹ بڑزکو کہول انا رابطہ غاتیا است جمی نا درشانی ءِ کرے۔ ہڑتوم آ برادر ملک آک اسہ ایلو نا غٹ جہانی و علاقائی فورم تیا تین پہ تینی مفاد نا معاملہ غاتیا اسہ ایلو تون کمک کیرہ۔ اوپارے کہ ہڑتوم آ ملک آتا نیام اٹ دفاع نا بشخ اٹی کمکاری ءِ ودفنگ خاص کر اسیجائی مشق ، تربیت و رابطہ غاتے ودفنگ آ بایدے خصوصی چکار کننگے ۔ وزیراعظم ترک سرکڑدہ نا کنڈآن نیک است خواہی تا ورندی ءِ ترسا پارے کہ حکومت آک و ہڑتوم آ ملک آتا الس مثالی برادرانہ تعلقداری تا حامل ءُ۔ اوہڑتوم آ ملک آتا نیام اٹ تین پہ تینی دفاعی کمکاری آ است جمی نا درشانی ءِ کریر۔ اوترکی نا چیف جنرل اسٹاف ءِ دہشت گردی نا برخلاف پاکستان نا سرسہب کوشست آتیان ہم معلومدار کرے۔ ہڑتوم آ کنڈآک پاکستان و ترکی نا نیام اٹ خڑکی و دوستانہ تعلقداری نا عزم انا اعادہ ءِ کریر و برادرانہ تعلقداری تے پین سوگو کننگ و اوفتے ٹی ودکی نا گرج آ ہم زور شاغار۔
