اسلام آباد۔ 03مئی (اے پی پی) وزیراعظم شاہد خاقان عباسی نا کماشی ٹی بنجائی کابینہ نا دیوان پنچ شنبے نادے وزیراعظم ہاؤس اسلام آباد اٹی اڈ ہلک۔ کابینہ پاکستان فزیکل تھراپی کونسل و پاکستان الائیڈ ہیلتھ پروفیشنلز و پیرامیڈیکس کونسل نا جوڑ کننگ نا اصولی منظوری ءِ تس۔ کابینہ پارت کرے کہ کابینہ کمیٹی لیجیسلیٹیو کیسز(سی سی ایل سی) نا مون آ مسودہ کانود پیش کننگے۔ کابینہ ءِ حج پالیسی 2018 ء و قرعہ اندازی نا عمل آ پیش رفت نا بابت آن ہم معلومدار کننگا۔ کابینہ پارت کرے کہ حج اکن قابل سگ و آسراتی تیان پُر گچین گام گیج آتے المی جوڑ کننگے۔ کابینہ کیبنٹ کمیٹی لیجیسلیٹیو کیسزنا 24اپریل 2018 ء آ مروک آ دیوان نا سفارش ، کابینہ نا اقتصادی رابطہ کمیٹی نا 12 اپریل 2018 ء نا دیوان نا فیصلہ و کابینہ کمیٹی توانائی نا 23 اپریل 2018 ء آ کراچی ٹی مروک آ دیوان نا فیصلہ غاتے پک کرے۔ کابینہ پروفیسر ڈاکٹر غزالہ صدیقی نابطور ڈائریکٹر سینٹر آف ایکسی لینس میرین بیالوجی یونیورسٹی آف کراچی تقرری نا منظوری ءِ تس ۔ کابینہ لاہو ر و پشاور اٹی اسپشیل کسٹمز ٹیکسیشن و اینٹی سمگلنگ کورٹس اٹی تعیناتی و بحالی نا ہم منظوری ءِ تس ۔ کابینہ وزیر آبی وسیلہ ءِ ہائیڈرل پاور پلانٹس نا کیس اٹی نیپرا نا کندآن ٹیرف نا تعین نا بابت نوٹیفکیشن نا جاری کننگ نا اختیار تس۔ داکان بیدس دیوان اٹی پاکستان ایران انویسٹمنٹ کمپنی نا چیئرمین یا ڈائریکٹر نا تقرری یا پنداری کن ہم منظوری تننگا۔ وزیر توانائی کابینہ ءِ ملک اٹی بجلی نا طلب و رسد نا بارواٹی ہم بریفنگ تس۔
