اسلام آباد ۔ 2 مئی (اے پی پی) بُنجاھی وزیر وانگ ءُُ زانگ ءُُ کزبی ھیل کاری انجینئرمحمد بلیغ الرحمن ءَ گوشت کہ حکومت ءَ وشھال ءُُ جان سلامتیں چاگرد ءِ جوڑیشت ءِ واستہ ملک ءِ ھمک زھگ ءَ را وانگ ءُُ زانگی پڑ ءَ آرگ ءِ واستہ حکومت ءَ جوانیں پالیشی سہرا کتگ، پالیشی ءِ چیر دستی ءَ ملک ءِ ھمک زھگ وانگ ءُُ زانگ ءَ چہ زھبر نہ بیت۔ آئی ءَ اے گپ علامہ اقبال اوپن یونیورسٹی ءَ ’’زھگ آنی بنداتی وانگ ءُُ زانگ ءُُ ھیل کاری ءُُ رکھینگ ‘‘ ءِ بن گپ ءِ سر ءَ دو 2روچی راجی کانفرنس ءِ بنگیجی دیوان ءَ گشتانک دیان ءَ کت۔ کانفرنس ءِ چیر دستی ءَ وزارت ءِ وانگ ءُُ زانگ ءُُ کزبی ھیل کاری ، ہائر ایجوکیشن کمیشن، علامہ اقبال اوپن یونیورسٹی ءُُ رُپانی فاؤنڈیشن ءِ یکجائی رنگ ءَ کتگ اَت۔ کانفرنس ءِ گشتانکار آں گوشت کہ زھگ آن بنداتی وانگ ءُُ زانگ ءُُ ھیل کاری ملک ءِ دیمروئی ءَ بنیاتی کرد پیلو کن اَنت۔ کانفرنس ءِ ایندگر گشتانکار آنی تہءَ وزارت ءِ وانگ ءُُ زانگ ءِ جوائنٹ ایجوکیشنل ایڈوائزر ٗ پروفیسر محمد رفیق طاہر ٗ چیئرمین رُپانی فاؤنڈیشن، نصرالدین رُپانی، یونیسف ءِ چیف آف ایجوکیشن، ایلن ون کلمتھاٹ، ایجوکیشن فاؤنڈیشن اوپن سوسائٹی ءِ کلانہ ایں پروگرام آفیسر، نرگس سلطانہ ، پلان انٹرنیشنل پاکستان ءِ ادارکی کنٹری ہیڈ ، نادیہ نور ءُُ اوپن یونیورسٹی ءِ فیکلٹی آف ایجوکیشن ءِ ڈین ، پروفیسر ڈاکٹر ناصر محمود ھوار اتنت۔مراگش ءَ گوں گشتانک دیان ءَ ڈاکٹر شاہد صدیقی ءَ گوشت کہ ارلی چائلیڈ ایجوکیشن ءِ سرءَ اولی کانفرنس ءِ سپارش ءَ علامہ اقبال اوپن یونیورسٹی ءَ را ھما ذمہ واری دیگ بوتگ انت آواناں جوانی ءَ پیلو کنگ بوھگ ءَ اِنت۔ ارلی چائیلڈ ایجوکیشن اینڈ کئیر” ءِ بن گپ ءِ سر ءَ اوپن یونیورسٹی ءِ نوکیں ریسرچ جرنل ءِ لانچنگ کنان ءَ محمد بلیغ الرحمن ءَ گوشت کہ یونیورسٹی ءِ اے جرنل زھگ آنی بنداتی ھیل کاری ءَ جوانیں کرد ءِ پیلو کنت، ھمے رنگ ءَ زھگ آنی رکھینگ ءُُ بنداتی وانگ ءُُ زانگ ءِ بنجاھ آؤٹ آف سکول زھگ آناں زانشت ءِ نیمگ ءَ آرگ ءِ ھاترا بنجاھی کرد پیلو کنت۔ انجنئیر محمد بلیغ الرحمن ءَ اے کامیاتی آنی پد ءَ وائس چانسلر ، پروفیسر ڈاکٹر شاہد صدیقی ءَ را مبارکی دات۔ ارلی چائیلڈ ایجوکیشن ءِ بن گپ ءِ سرءَ پوسٹ مقابلی ءُُ مشاعرہ ھم برجم دارگ بوت۔
