وت مہ وتی تجارت آناں گیش ودینگ ، دوئیں ملک آنی الس آنی نیام ءَ رابطہ آنی دیمروئیءِ بابت ءَ ھیال ریچی کنگ بوت
اسلام آباد ۔ 2 مئی (اے پی پی) کینیا ءِ وزیر ءِ درئی کار ڈاکٹر مونیکا جوما ءَ درئی کارانی کارگس ءَ سیکرٹری درئی کار تہمینہ جنجوعہ ءَ گوں گند ءُُ نند کت۔ چار شمبے ءَ درئی کارانی کارگس ءِ رد ءَ یک مئی ءَ بوھوکیں اے گند ءُُ نند ءَ گپ ءُُ تران ءِ ساھت ءَ وت مہ وتی یکوئی ءِ دو نیمگی، دمگی ءُُ میاں اوستمانی کار آں ھوار دو نیمگی تجارت آناں گیش ودینگ ءُُ دوئیں ملک آنی الس آنی نیام ءَ رابطہ آنی دیمروئی ءِ واستہ گامگیج آنی سر ءَ ھیال ریچی کت۔ کینیا ءِ وزیر ءِ درئی کار ڈاکٹر مونیکا ءَ اے گپ ءِ سر ءَ زور دات کہ دوئیں ملک آنی کشت ءُُ کشاری، فارماسیوٹیکلز،یوتھ ڈویلپمنٹ ءُُ دیمپانی کمک ءِ وڑیں وت مہ وتی واھگی شوبگ آنی تہ ءَ کار کنگ لوٹ ایت۔ آئی ءَ گوشت کہ دو نیمگی یکوئی آناں گیش دیم ءَ تیلانک دیگ ءِ واستہ کمکی منوگر ءِ ضلورت اِنت۔ وزیر ءِ درئی کار ءَ سیکرٹری درئی کار ءَ را رودراتکی افریقی پڑ ءَ سیکورٹی ءِ جاور ھال آنی بابت ءَ بریف دات۔ اے موہ ءِ سر ءَ سیکرٹری درئی کار تہمینہ جنجوعہ ءَ کینیا ءِ درئی کارانی وزیر ءَ را ھمساھگیں ملک آنی گوما یکوئی ءُُ مقبوظہ کشمیر ءَ بنی آدم آنی ھک ءِ ھرابیں جاور ھال آنی بابت ءَ بریف کت۔ وزیر ءِ درئی کار ڈاکٹر مونیکا جوما کینیا ءِ صدر ءِ ھاسیں ربال ءِ بستار ءَ پاکستان ءِ تر ءُُ تاب ءَ کنگ ءَ اِنت۔ ایشی ءَ چہ پیسر آئی ءَ مزن وزیر شاہد خاقان عباسی ءَ گوں گند ءُُ نند کت ءُُ آئی ءَ را کینیا ءِ صدر ءِ نیمگ ءَ کینیا ءِ تر ءُُ تاب کنگ ءِ دعوت نامہ پُجارینت۔
