اسلام آباد ۔01مئی(اے پی پی) بنجائی وزیر سمندر پار پاکستانیز و شونداری و انسانی وسیلہ پیر سید صدرالدین شاہ راشدی پارینے کہ ساڑی آ حکومت ملک انا جوڑ جاڑ و راجی و اقتصادی شونداری ٹی مزور آتا قابل قدر شریداری ءِ امنا کیک و اوفتے خراج تحسین پیش کیک، مزور آک ننا معیشت نا شونداری ٹی مخ انا ملی نا حیثیت تخرہ و ملک پاکستان نا اقتصادی شونداری نا کچ ، امن وہم گرنچی ءِ ودفنگ کن اوفتا کمک و لگن المی ءِ۔ مزور آتا جہانی دے انا وخت آ اوتینا اسہ کلہو اسے ٹی پارے کہ وزارت سمندر پار پاکستانیز و شونداری انسانی وسیلہ مزور آتا گچینی و شرحالی کن جانفشانی اٹ دے و نن کوشست کننگ ءِ ۔ دا ننا اولیت ءِ کہ ملکی کہول آ مزور آتا غٹ کانود آتے جہانی آب انا رداٹ قلمبند کننگے و دا کانود آتا عملدرآمد اٹ تسلسل اتنگے۔ وزارت غٹ صوبائی حکومت و ایلو راجی شریدار آتا کمک اٹ مزور آتا بنداوی حق انا رکھ ءِ مچ آ ملک اٹ المی جوڑ کننگ نا کوشست آتا کنڈآ روان ءِ۔ پاکستان انٹرنیشنل لیبر آرگنائزیشن (آئی ایل او) نا 36 کنونشن بشمول 8 بنداوی کنونشن آتا منظوری ءِ تسنے ہرافتیا سختی اٹ عملدرآمد جاری ءِ۔ مزور و آجر ننا ملکی معیشت نا بنجائی ءُ بشخ اسے و کسب کار مزور ملک انا راجی ، اقتصادی شونداری ٹی اہم کڑد ادا کننگ ءِ۔ وزارت اسہ وار ولدا تینا عزم انا اعادہ ءِ کیک کہ او مزور آتا بنداوی حق انا پاسداری ٹی ہروڑ کوشست کیک۔ مزور آتا دا جہانی دے انا مناسبت اٹ ای پاکستان نا غٹ مزور آتا است انا ھب اٹ اوفتا خواری و جفاکشی آ مبارکبادی پیش کیوہ و اوفتا گچین و شونہال آخبت کن دعا کیوہ۔
