اسلام آباد۔ 30 اپریل (اے پی پی) وزیر داخلہ پروفیسر احسن اقبال امیگریشن کمامدار آتے پارت کرینے کہ پاکستان آ بروک آتا خوش اخلاقی اٹ استقبال ءِ کننگے درملکی مسافر آتے ’’ویلکم ٹو پاکستان ‘‘ و پاکستانی تے ’’ویلکم ٹو ہوم ‘‘ پاننگے، پوسکن آ بالی پٹ انا ڈٹ خراب حالیت اٹ میرات اٹ ملا، نواز شریف اودے حقیقت نا دروشم اس تس، پاکستان اٹی اینو جہانی آب انا بالی پٹ انا بناء مننگ ءِ، دا ڈٹ ہمو شونداری و شونہالی نا علامت ءِ ہراڑآ نن ملک ءِ روان کرین۔ دوشنبے نادے پوسکن آ اسلام آباد بالی پٹ انا دورہ ٹی وزیر داخلہ پروفیسر احسن اقبال پوسکن جوڑ مروک آ بالی پٹ انا چندی بشخ خاص کر امیگریشن کاؤنٹر ز و لاؤنجز نا معائنہ ءِ کرے و ہموڑے تعینات اسٹاف تون اوڑدہی کرے۔ اودا وخت آ امیگریشن کمامدارآتے پارت کرے کہ پاکستان آ بروک آتا خوش اخلاقی اٹ استقبال ءِ کننگے، ہر درملکی مہمان ءِ ’’ویلکم ٹو پاکستان‘‘و پاکستانی ءِ ’’ویلکم ٹو ہوم‘‘ پاننگے تانکہ پاکستان آ بننگ آ او خوشی و عزت و شرف محسوس کیر و پاکستان ناگچین امیج تالان مرے۔ اوپارے کہ مہمان تے کن کاؤنٹر ز آ خوش اخلاق و مستعد عملہ تعینات کننگے۔ او امیگریشن عملہ تون اوڑدہی کرے و اوفتیا زورشاغا کہ تینا رویہ و اخلاق اٹ ملک انا عزت و وقار اٹ ودکی کیر و تینے پاکستان نا سفیر سرپند کرسا تینا فرض ءِ ادا کیر۔ وزیر داخلہ مسافر آتے پوسکن آ بالی پٹ آن جہاز آتا شیڈول آن معلومدار کننگ کن اشتہار تننگ و بالی پٹ شٹل سروس ءِ چلیفنگ نا ہم پارت کرے۔ اوفرسٹ و بزنس کلاس تون اوار غٹ مسافر آتے تروک آ آسراتی ، لاؤنجز و کاؤنٹرز نا ہم معائنہ ءِ کرے۔ اوکان پد میڈیا تون ہیت وگپ کرسا او پارے کہ پاکستان نا دارالحکومت اٹی جہانی آب انا بالی پٹ انا بنا غا او قوم ءِ مبارکباد پیش کیک، دا ڈٹ ننے بے کچ خراب حالیت اٹ میرات اٹ ملاسس، نواز شریف نا پارت آ دادے 5سال اٹی حقیقت نا روپ تننگا۔ داڈٹ ہمو شونداری و شونہالی نا علامت ءِ ہراڑآ نن ملک ءِ روان کرینن۔
