اسلام آباد۔ 01مئی (اے پی پی) مسلم لیگ (ن) نا باسک قومی اسمبلی طاہرہ اورنگزیب پارینے کہ بنجائی بجٹ 2018-19 ء ٹی اولیکو وار ملک اٹی فلم صنعت ءِ مون آ دننگ کن خصوصی تفریح تیان بیدس آرٹسٹ کمیونٹی نا است بڈی و شرحالی کن حکومت خصوصی پیکج نا پڑو ءِ کرینے ۔ اے پی پی تون ہیت وگپ کرسا اوپارے کہ آرٹسٹ کمیونٹی نا شرحالی کن خصوصی پیکج نا کمک اٹ ہروڑنا حقی مشکل طبی امداد اُرائی دشواری کن فنڈ ہلنگ کیرہ ہرا گچین مروک آ حکومت بجٹ اٹی پڑو ءِ کرے۔ دانا رداٹ فلم انڈسٹری نا آب ءِ ودفنگ کن فلم سازی نا مشینری نا برآمد و خراج اٹی کمتی آن استفادہ کننگ کینہ۔ اوپارے کہ ملک اٹی فلم صنعت نا است بڈی کن پوسکن آ مالی سال 2018-19 ء ٹی خصوصی گام گیج کننگ انگ ءِ ہرا دا بشخ اتون گنڈوک خلقت کن مالی و کٹیا ودی کننگ اٹی کمک رسینگک وخت اس کہ دا گام گیج آن ننا سینما تے ٹی درملکی فلم آتا سکریننگ نا رجحان ءِ ہم است بڈی رسینگک ہراڑآن بھاز زیات پیسہ کٹیا کننگ انگ ءِ۔ طاہرہ اورنگزیب پارے کہ دافلم آتے چین اٹی ہم نشان تننگک ہرا ہندی صنعت نا مون آ دننگ کن اسہ گچین ءُ گام اس جوڑ مریک۔ اوپارے کہ حکومت بنداوی گڑاتا نرخ آتیا ہچ ءُ خراج اس خلتنے بلکن اولیکو چندی بشخ آتیان تعلق تخوک آ بندغ آتا خراج آتا زیات کچ ءِ کم کننگ و خراج آتے ٹی آسراتی نا پڑو ءِ کرینے ہرا اسہ جوان ءُ گام گیج اسے۔
