اسلام آباد۔ 01مئی (اے پی پی) صدر مملکت ممنون حسین پارینے کہ قومی شونداری نا عظیم جہد اٹی خواری کش آتا کڑد بنداوی اہمیت تخک۔ حکومت ملک انا تہہ ٹی کاریم کروک آ خواری کش آتون اوار اوار پیشن نا ملک کاریم کروک آ کارندہ غاتا ویل آتاایسری و شرحالی کن چندی ڈٹ آتیا عمل کننگ ءِ، اومیت ءِ کہ خواری کش آک تینا شاندار روایت آتے برقرار تخسا ملکی جوڑ جاڑ و شونداری کن تینا کڑدءِ ادا کرسا کیرہ۔ اوداہیت ءِ خواری کش آتا جہانی دے انا وخت آ قوم انا پن تینا کلہو اٹی پارے ہرا (اینو) سے شنبے نادے پاکستان تون اوار مچ آ دنیا ٹی جوش و جوزہ اٹ اڈ تننگ انگ ءِ۔ صدر پارے کہ پاکستان تون اوار مچ آ دنیا ٹی اینو نادے خواری کش آتا حق انا رکھ انا علامت نا وڑاٹ اڈ تننگک ۔ اوپارے کہ پاکستانی راج اٹی آجر و اجیر نا رشتہ رحمت عالم حضور اکرم نا دا فرمان آ استوار ءِ ۔’’خواری کش اللہ نا دوست ءِ ہنداخاطرآن اونا حق ءِ اونا خید انابارنگ آن مست تننگے‘‘ ہرا خواری کش آتا حق انا رکھ انا ردٹ اسہ شاندارمعاہدہ اسے نا گچین ءُ اصول اسے۔
