اسلام آباد۔ 01 مئی (اے پی پی) وزیراعظم شاہد خاقان عباسی پارینے کہ پاکستان شکاگو نا ہمو کارندہ غاتا لازوال جہد ءِ خراج عقیدت پیش کننگ اٹ جہانی برادری تون اوار ءِ ہراک وخت انا منصفانہ و ایماندارنہ چاگڑد نا دوئی کن تینا جان تے ندر کریر ہراڑآن مزور و کارندہ غاتا بنداوی حق انا ادائیگی المی مریک، اینو نن پاکستان و مچ آ دنیا نا ہمو بہادر کارندہ غاتے خراج عقیدت پیش کینہ و خواری نا عظمت نا تینا عزم انا اعادہ ءِ کینہ۔ خواری کش آتا جہانی دے انا وخت آ تینا کلہو اٹی وزیراعظم پارے کہ ہر سال یکم مئی ننے دا موقع ءِ فراوان کیک کہ نن مچ آ دنیا نا قوم تا شونداری و شونہالی ٹی کارندہ غاتا گراں قدر کڑد و قربانی تا اعتراف ءِ کین۔ پاکستان نا شونداری ٹی فعال و متحرک افرادی واک ہی حقی محرک ءِ حکومت نا ترند تر و پائیدار شونداری نا ہدف بیرہ ننا محنتی ، بے لو ث و کاریم تون لگن والا افرادی واک انا سوب آن ہی پورو مننگ ءِ۔ اوپارے کہ ای داوخت آ مچ آ پاکستان نا کارندہ غاتے باوری ایتیوہ کہ بنجائی حکومت مدام مزور دوست پالیسی تے تینا کننگ آ زور شاغانے و پین وخت اس ہم نن صوبائی حکومت آتا کمک اٹ دُن انگا غٹ ورکرز دوست گام گیج کننگ نا پکا عزم کرینن ہرافتا سوب کارندہ و اوفتا خاہوت آتا شرحالی تون اوار اوار اوفتا زند انا آب ءِ ہم گچین جوڑ کننگ مرے۔
