جدہ۔ 29 اپریل (اے پی پی) امام کعبہ عبدالرحمان السدیس ءَ گوشت کہ سعودی عرب ’’اعتدال پسندی ‘‘ ءُُ ایمنی ءِ برجائی ءِ واستہ وت مہ وتی ءَ را دیمروئی دیگ ءَ اِنت، اسلام ھمک رنگ ءِ ناشرکاری ءَ را رد گوشیت۔ اے رد ءَ مسلم ملک آنی ھال رسانکی در آناں وتی المی ایں رد پیلو کنگی اِنت۔ آئی ءَ اے گپ راجی ھال رسانکی در ایسوسی ایٹڈ پریس آف پاکستان (اے پی پی) ءِ منیجنگ ڈائریکٹر مسعود ملک ءِ سروکی ءَ پاکستانی میڈیا ڈل ءَ گوں تران کنان ءَ کت ایشاں مدینہ منورہ ءَ آئی ءِ کارگس ءَ گوں گند ءُُ نند کت۔ حرمین الشریفین ءِ ’’عمومی صدر‘‘ ءُُ امام کعبہ ءَ گوشت کہ درستاناں ھمک وڑ ءَ اسلام ءِ دیمپانی ءِ واستہ کار کنگ لوٹ ایت ءُُ ناشرکاری ءَ را اسلام ءَ وتی دست پنجگ آں زورگ ءِ موہ دیگ نہ لوٹ ایت۔ اسلامی میڈیا ءِ ھوالگ ءَ آئی ءَ گوشت کہ مسلم ملک آنی تہ ءَ اھوالکار آنی سر ارزشتی ایں زمہ واری ءِ پر اِنت کہ آ راستیں اسلام ءِ دیمپانی ءِ بکن اَنت ایش ناشرکاری ءَ را رد کنگ ءُُ ایمنی ءُُ سگ ءُُ اوپار کشی ءِ سبک ءَ دنت۔ آئی ءَ گوشت کہ خادم الحرمین الشریفین ءُُ سلطنت سعودی عرب مُدام حج ءُُ عمرہ کنوک آنی ازمت ءَ کن اَنت چیا کہ ما اللہ تعالیٰ ءِ مہمان آنی ازمت کنگ ءَ وتی اولی پرز سما باں۔ شیخ عبدالرحمان ءَ گوشت کہ سعودی عرب مسلم امہ ءِ یکوئی ، مکہ مکرمہ ءُُ مدینہ منورہ ءِ شرپ مندیں جاھ آنی پاسبانی ءُُ دیمروئی ءَ ارزشتی ایں کرد ءَ پیلو کنگ ءَ اِنت۔ آئی ءَ گوشت کہ پاکستان ءُُ سعودی عرب مھکمیں سنگت اَنت ءُُ دویں مسلمان آنی مڈی اَنت۔ آئی ءَ پاکستان ءُُ سعودی عرب ءِ سلامتی ءُُ دوئیں راج آنی دیمروئی ءُُ وشھالی ءِ واستہ نیکیں واھگ آنی ھم درشان کت۔ امام کعبہ ءَ پاکستان ءُُ پاکستانی راج ءَ گوں محبت ءِ درشان کنان ءَ اُردو زبان ءَ پاکستان زندہ باد ءِ نھردگ جت۔
