اسلام آباد۔ 23 اپریل (اے پی پی) مزن وزیرشاہد خاقان عباسی ءَ پاکستان ءُُ سری لنکا ءِ نیام ءَ سیکورٹی کمک آنی سرءَ دل یکیمی ءِ درشان کنان ءَ گوشت کہ دمگی ایمنی دوئیں ملک آنی یکجائی مول ءُُ مراد اِنت ایش دیمپانی ءِ پڑ ءَ دراج بُریں ءُُ ازمی تک ءَ سیت ایگ اَنت۔ آئی ءَ اے گپ سری لنکن آرمی ءِ کمانڈر لیفٹیننٹ جنرل مہیش سینا نائیکے ءَ گوں تران کنان ءَ کت آئیءَ دو شمبے ءَ مزن وزیر کارگس ءَ آئی ءَ گوں گند ءُُ نند کت۔ گند ءُُ نند ءِ ساھت ءَ دو نیمگی دیمپانی ءُُ یکوئی ءُُ وت مہ وتی کمکی کار آنی سر ءَ گپ ءُُ تران کنان اَت۔ لیفٹیننٹ جنرل مہیش سینا نائیکے ءَ جوانیں وش اتک ءِ رد ءَ مزن وزیر ءِ شگر ءُُ منت گپتت ءُُ ناشرکاری ءِ ھوپ ءِ ھلاپ ءَ جنگ ءَ پاکستانی راج ءُُ ایشی ءِ دلیریں اُرد ءِ بے دروریں کربانی آناں ساڑات آئی ءَ گوشت کہ سری لنکا پاکستان ءِ گوما وتی یکوئی آناں گیش شاھیگانی دیگ ءُُ سیکورٹی ءُُ دیمپانی ءِ شوبگ ءَ دراج بُریں کمک ءِ دیمروئی دیگ ءِ واھشت مند انت۔
