مزن وزیر ءِ کوئٹہ ءِ تر ءُ تاب ءُ اپیکس کمیٹی ءِ دیوان ناشرکاری ءِ ھلاپ ءَ راجی جزم ءِ درشان انت، جمال شاہ کاکر

کوئٹہ۔ 09 جولائی (اے پی پی): پاکستان مسلم لیگ بلوچستان ءِ جنرل سیکرٹری ءُ باسک راجی اسمبلی جمال شاہ کاکر ءَ مزن وزیر محمد شہباز شریف ءِ کوئٹہ ءِ تر ءُ تاب ءِ نام داتگ ءُ صوبائی اپیکس کمیٹی ءِ دیوان ءِ سروکی ءَ کتگ ءُ اے سرجمیں امن ءُ ایمنی ءِ جاور ھال ءِ سر ءَ سرجمیں چار ءُ تپاسی کتگ کہ اے گپ ءِ پدریں ثبوت کہ وفاقی حکومت بلوچستان ءِ امن، دیمروئی ءُ راجمانی جیڑہاں اولی ترجی دیگ ءَ انت۔ یک بیانے ءِ تہ ءَ جمال شاہ کاکر ءَ گوشت کہ مزن وزیر شہباز شریف ءَ اپیکس کمیٹی ءِ دیوان ءَ ناشرکاری ءِ ھلاسی، امن ءُ ایمنی ءِ برجائی ءُ الس ءِ جان ءُ مال ءِ رکھینگ ءِ ھوالگ ءَ یک ھاسیں ءُ بے دروریں موقف ءِ گپتگ۔ آئی ءَ گوشت کہ ناشرکاری ءِ ھلاپ ءَ جنگ ءَ سرجمیں راج وتی سلاہ بندیں اُرد ءُ کانود ءِ نفاذ ءِ ادارگ آنی گوما اوشتاتگ ءُ راج دژمنیں عناصر وتی نا شریں ارادہ آنی تہ ءَ کدی سوبمند نہ بنت۔ آئی ءَ گوشت کہ بلوچستان ءَ گوستگیں ناشرکاری ءِ وئیل انتہائی افسوس ءِ گپ انت، بلے سیکورٹی فورسز ءِ وھد ءِ سر ءَ ءُ موثریں کارروائی آنی سبب ءَ ناشرکار آنی نا شریں ارادہ ناکام بوتگ انت۔ ناشرکاری ءِ ھلاپ ءَ جنگ ءَ شھیدانی قربانی راج دائم ءَ یات بیت ءُ آیانی ھون کدی بے سوب نہ رو اَنت۔ جمال شاہ کاکر ءَ گوشت کہ مزن وزیر ءِ سروکی ءَ اپیکس کمیٹی ءِ دیوان ءَ چہ فیڈریشن ءُ صوبگ ءِ نیام ءَ موثر رابطہ، ناشرکاری ءِ ھلاپ ءَ گہتریں حکمت عملی ءُ یکجاھیں گامگیج آناں پدر کنگ بیت۔ آئی ءَ گوشت کہ بلوچستان حکومت ءُ وفاقی حکومت نہ ایوک ءَ امن ءُ ایمنی ءِ جاور آناں وت مہ وتی کمک ءَ گوں گیش گہتر کن اَنت بلکینگ ءَ صوبہ ءِ دیمروئی، راجی وشھالی ءُ سرمایہ کاری ءِ دیمروئی ءِ واستہ عملی گامگیج برجاہ دار اَنت۔ آئی ءَ گوشت کہ پاکستان مسلم لیگ ءِ حکومت بلوچستان ءَ برجمیں امن، دیمروئی منصوبگ آنی وھد ءِ سر ءَ سرجم کنگ، روزگار ءِ موہ پجارینگ ءُ الس ءِ گہبودی ءِ واستہ وتی توامیں توان آناں کارمرد کنگ ءَ انت۔ انشاءاللہ ناشرکاری ءِ آفت ءِ ھلاس کنگ ءَ بلوچستان ءَ امن، مھکم، ءُ وشھالی ءِ جھولا جوڑ کنگ بیت۔