مزن وزیر شاہد خاقان عباسی ءِ کراچی ءَ ’’سی پیک سمٹ‘‘ ءَ گوں گشتانک

سی پیک سئے سال ءَ چہ کم وھد ءُُ پاس ءَ یک گواچن ءِ جوڑ بوتگ، اے ایوک ءَ استیں ناں بلکیں آیوکیں باھند آنی واستہ ھم جوانیں برورد آنی بستار کرزیں منصوبگ اِت، اے منصوبگ ءَ پاکستان ءَ را ھواریں دیمروئی ءُُ وشھالی ءِ واستہ مھکمیں بنیات پُجارینتگ، پاکستان ءَ ھوار گیشتریں پڑ اے منصوبگ ءَ چہ سیت مند بیت
کراچی ۔ 23 اپریل (اے پی پی) مزن وزیر شاہد خاقان عباسی ءَ گوشت کہ پاک چین اقتصادی راہداری (سی پیک) ایوک ءَ استیں ناں بلکینگ ءَ آیوکیں باھند آنی واستہ ھم جوانیں برورد آنی بستار کرزیں منصوبگ اِت، ایشی ءَ چہ پاکستان ءَ ھوار گیشتریں پڑ سیت مند بیت۔ آئی ءَ اے گپ دو شمبے ءِ روچءَ ادا ’’سی پیک سمٹ‘‘ ءَ گشتانک دیان ءَ کتت ایشی ءِ بندوبست ڈان میڈیا گروپ ءِ وزارت ءِ منصوبگ بندی ءُُ دیمروئی ءِ شریکداری ءَ کنگ بوت۔ مزن وزیر ءَ گوشت کہ سئے سال ءَ چہ کم وھد ءُُ پاس ءَ اے منصوبگ یک گواچن ءِ جوڑ بوتگ۔ آئی ءَ گوشت کہ اے منصوبگ ءَ پاکستان ءِ ھواریں دیمروئی ءُُ وشھالی ءِ واستہ یک مھکمیں بنیات ءِ پُجارین تگ۔ آئی ءَ گوشت کہ سی پیک ءِ برورد ایوک ءَ پاکستان ءَ نہ بنت بلکینگ ءَ اوگانستان ءُُ روبرکتی چین ءَ ھوار ایندگر ملک ءَ ھم اے منصوبگ ءَ چہ نپ چست کن اَنت۔ آئی ءَ گوشت کہ راستی ءَ سی پیک پڑ ءِ توامیں ملک آنی واستہ یک موہ اِت ءُُ اے بنیاتی کوکا ءُُ ھاٹیگ ءِ شوبگ ءِ سرءَ دلگوش دنت۔ شاہد خاقان عباسی ءَ گوشت کہ سی پیک ءِ چیر دستی ءَ پاکستان ءَ توان ءِ ٹرانسمیشن لائنز چیر گیجگ بوھگ ءَ اِنت ءُُ ھاسیں اقتصادی زونز آنی برجائی ءَ چہ چین ءُُ سرجمیں دُگنیا ءَ کاروبار ءِ موہ آناں دیمروئی رسیت ءُُ تجارت ءِ تہ ءَ گیشی بیت۔ مزن وزیر ءَ گوشت کہ اے کانفرنس ءَ بھر زوری کنگ آئیءِ واستہ شرپ ءِ گپ اِنت ءُُ سی پیک منصوبگ پاکستان ءُُ چین ءِ نیام ءَ مھکمیں دوستی ءِ درور اِنت۔ آئی ءَ گوشت کہ بیلٹ اینڈ روڈ منصوبگ چینی صدر شی جن پنگ ءِ وژن بوتگ ءُُ آ اے منصوبگ ءِ وسیلگ ءَ چین ءَ را نیامی رودراتک، نیامی ایشیا ءَ ھوار ایندگر پڑ آں گوں ھوار کنگ ءِ واھشت مند اِنت۔ شاہد خاقان عباسی ءَ گوشت کہ سی پیک ءِ چیر دستی ءَ ھاسیں اقتصادی زونز آنی برجائی پاکستان ءُُ چین ءَ ھوار ایندگر ملک آنی کاروباری مردم آناں موہ پُجارین ایت ایشی ءَ چہ قومی معشیت ءَ دیم ءَ جنزگ ءِ کمک رسیت۔ ایشی ءَ چہ پیسر مزن وزیر ءَ اوگانستان ءَ ناشرکاری ءِ استیں واکیہ آنی سر ءَ ترندی ءَ ایراد گپت ایشی ءِ تہءَ 50پنجاھ ءَ چہ زیات مردم بیران بوتگ اَنت۔