لندن۔ 20 اپریل (اے پی پی) مزن وزیر شاہد خاقان عباسی ءَ برطانوی مزن وزیر تھریسامے ءَ آدینگ ءِ روچءَ ادا ونڈسر کیسل ءَ گند ءُُ نند کت۔ گند ءُُ نند ءِ ساھت ءَ وت مہ وتی یکوئی کار آنی سرءَ ھیال ریچی بوت۔ اے گند ءُُ نند ءِ تہءَ دولت ءِ مشترکہ سروکیں حکومت آنی 25بیست ءُُ پنچمی دیوان ءِ موہ ءَ بوت۔ مزن وزیر شاہد خاقان عباسی ءَ برطانوی مزن وزیر ءَ را دولت ءِ مشترکہ ءِ سروک حکومت ءِ دیوان ءِ کامیاتیں برجائی ءِ پد ءَ مبارکی دات۔ آئی ءَ کشمیر الس ءِ جنز ءَ را سہرا کنان ءَ میاں اوستمانی برات آنی سرءَ زور پر دات کہ بھارتی مقبوضہ کشمیر ءَ بنی آدم آنی ھک ءِ ھلاپ کنوک آنی استیں جاور ھال ءِ سر ءَ نوٹس زورگ بہ بیت۔ مزن وزیر شاہد خاقان عباسی ءَ برطانوی مزن وزیر ءَ را ناشرکاری ءُُ گر ءُُ چیل ءِ ھلاپ ءَ جنگ ءَ پاکستان ءِ کوشست آں چہ سرپد کت۔ آئی ءَ دو نیمگی ھاسیں تجارت ءُُ سرمایہ کاری ءِ شوبگ ءَ یکوئی آناں مھکم کنگ ءِ ارزشت ءِ سرءَ زور پر دات ءُُ برطانیہ ءِ دیمروئی اداگ ءِ نیمگ ءَ پاکستان ءَ کار کنگ ءِ شگر گپت۔ آئی ءَ برطانوی حکومت ءِ نیمگ ءَ ھاسیں بریگزٹ ءِ رد ءَ دوئیں ملک آنی نیام ءَ تجارت ءُُ سرمایہ کاری ءِ موہ ءِ پٹ ءُُ پول کنگ ءَ کمک ءِ واستہ ٹریڈ ءِ جوڑیشت ءَ را ساڑات۔ آئی ءَ وتی تر ءُُ تاب ءِ کابل ءِ ھوالگ ءَ دیان ءَ اوگانستان ءَ ایمنی ءُُ برجائی ءِ واستہ پاکستان ءِ جزم ءَ را ھم سہرا کت۔ برطانوی مزن وزیر تھریسامے ءَ ناشرکاری ءِ ھلاپ ءَ پاکستان ءِ کوشست آناں ساڑات ءُُ گوستگیں 10سال آنی ساھت ءَ ناشرکاری ءِ ھلاپ ءَ جنگ ءَ یک لکھ پاکستان آنی آماچ بوھگ ءِ تران کت۔ آئی ءَ مزن وزیر شاہد خاقان عباسی ءِ نیمگ ءَ آئی ءِ استیں کابل ءِ تر ءُُ تاب ءَ ایمنی ءِ ھوالگ ءَ کوشست آناں ساڑات۔ آئی ءَ گوشت کہ پاکستان ءُُ برطانیہ ءِ مھکمیں یکوئی اَست اَنت وھدیکہ دوئیں ملک آنی نیام ءَ تجارت ءَ را گیش ودینگ ءِ ضلورت اِنت۔ برطانوی مزن وزیر ءِ نیمگ ءَ چہ کیمیائی وتاس آنی کارمردی ءِ تران ءِ سرءَ مزن وزیر شاہد خاقان عباسی ءَ کیمیائی وتاس آنی کجام ھم نمونگ ءَ کارمردی ءَ را ایراد گپت ءُُ اقوام ءِ متحدہ ءِ چارٹر ءِ تہ ءَ ھواریں رھبند آنی ھوالگ ءَ پاکستان ءِ رھبند آنی در جنگ ءِ بُن لیکہ ءِ درشان کت۔
