اسلام آباد۔18اپریل (اے پی پی ) اقوام متحدہ ءِ تہا پاکستان ءِ پکہ سفیرملیحہ لودھی ءَ گشتگ کہ مقبوضہ کشمیر ءَ زالبولانی سرءَ زُلمءُ لٹءُ کٹءُ جنسی تشدد ءَ را ھلاس کنگءِ ضلورت اِنت ، آئیءَ سرجمیں دنیاءِ تہا جنسی بے شرپی ءُ ترسءُ بیم ءِ تہا کنگءَ ھلاس کنگءِ لوٹ کتگءُ گشتگ کہ مقبوضہ کشمیرءِ تہا زالبولانی سرءَ تشدد ءِ ھلاس کنگءِ ھاترءَ اقوام متحدہ ءِ سلامتی کونسل وتی کردءَ پیلو بہ کنت۔ اقوا م متحدہ ءِ سلامتی کونسل ءِ تہا جنسی تشدد ءِ ھلاس کنگءِ ھوالگءَ ترانءُ کتگءُ پاکستانءِ سفیر ملیحہ لودھی ءَ گشتگ کہ میانمار ءَ بہ گر تاں مقبوضہ کشمیر ءَ سرجمیں دنیاءِ تہا زالبولانی سرءَ تشدد کنگ بوھگءَ انت اے ھلاس کنگ بہ بیت۔ ملیحہ لودھی ءَ گشتگ کہ سرجمیں دنیاءِ تہا امنءُ ایمنی جوڈ کنگءِ ھاترءَ جاری امن ءُ ایمنی مشن ءِ تہا پاکستانءِ فوج ھاسیں کرد پیلو کنگءَ انت ءُ اے وھدءَ سرجمیں دنیاءِ تہا اقوام متحدہ ءِ امن مشن ءِ تہا 7ہزار ءَ چہ گیش پاکستانی فوجی وتی ازمتءَ پیش کنگءَ اَنت۔ پاکستانی سفیر ءَ گشتگ کہ گوستگیں وھدانی تہا یک لکھ 70ہزار ءَ چہ گیش پاکستانی ءَ وتی ازمت داتگ ءُ امنءُ ایمنی مھکمی ءِ ھاترءَ 144 ءَ چہ گیش اُرداں وتی جان ندر کتگ اَنت۔
