اسلام آباد۔17اپریل (اے پی پی) پاک بحریہ ءِ سروک ایڈمرل ظفر محمود عباسی ءَ چین ءِ سرکاری ترءُ تابءِ وھدءَ چینءِ بحریہ ءِ سروک وائس ایڈمرل شین جنلونگ ءُ اسٹیٹ ایڈمنسٹریشن فارسائنس ، ٹیکنالوجی اینڈ انڈسٹری ءِ ڈپٹی ایڈمنسٹریٹر زو زھانبِن ءَ گوں گندءُ نند کتگ۔ پاک بحریہ ءِ جارچین ءِ گشگءِ ردءَ بیجنگ ءَ استیں چینءِ بحریہ ءِ ہیڈ کوارٹرز ءَ سربوھگءَ چینءِ بحریہ ءِ سروک وائس ایڈمرل شین جنلونگ ءَ پاک بحریہ ءِ سروکءَ را وش اَتک کتگ۔ چین ءِ بحریہ ءِ دستہءَ نیول چیف ءَ را سلامی پیش کتگ۔ ایشی ءَ پد پاک بحریہ ءِ سروک ءَ چین ءِ بحریہ ءِ سروک ءَ گوں گندءُ نند کتگ۔ گندءُ نندءِ تہا دونیمگی کسبی کارءُ دونیمگی شریداری ءُ بحرِہند ءِ سکیورٹی جاورھال ءِ سرءَ ھیالءُ لیکہ ءِ درشانی کتگ۔ دوھیں بحری فوج آنی نیامءَ باشیں پڑآنی تہا ھم گپءُ تران کنگ بوتگ۔ ایڈمرل ظفر محمود عباسی ءَ را چینءِ بحریہ ءِ ھوالگءَ شونشت دیئگ بوتگ۔ پاک بحریہ ءِ سروک ءَ ناشرکاری ءِ ھلاپ ءِ جنگءَ پاکستان ءِ جزم ءُ کردءَ ھوار میری ٹائم ناشرکاری ءُ بحری ڈونگانی گرءُ دار ءِ ھوالگءَ کثیرالقومی ٹاسک فورس ءِ تہا پاک بحریہ ءِ شریداری ءِ سرءَ چمشانک داتگ۔ چینءِ بحریہ ءِ سروک ءَ خطہ ءِ تہا یکجائی میری ٹائم سکیورٹی ءَ را المی کنگءِ ھوالگءَ پاک بحریہ ءِ ازمت ءُ جزم ءَ را ساڑاتگ۔ وائس ایڈمرل شین جنلونگ ءَ گشتگ کہ پاک بحریہ خطہ ءِ تہا میری ٹائم امنءُ ایمنی ءُ مھکمی جوڈ کنگءَ کرد پیلو کنگءَ اِنت کہ خطہ ءِ تہا آزاتیں جہازرانی ءِ ھاترءَ محفوظ چاگرد پھجارینگ ءَ ھاس کمک کار بیت۔ ایشی ءَ چہ پیسر ایڈمرل ظفر محمود عباسی ءَ اسٹیٹ ایڈمنسٹریشن فارسائنس ، ٹیکنالوجی اینڈ انڈسٹری ءِ ڈپٹی ایڈمنسٹریٹر زو زھانبِنءَ گوں گندءُ نندکتگ۔
