اسلام آباد۔11اپریل (اے پی پی) ملک ءِ صدر ممنون حسین ءَ گشتگ کہ جنوبی ایشیائی خطہ ءِ ملک آنی جیڑھ یک وڈ اَنت، ھمے ھاترءَ سولءُ تران ءُ کمک ءِ سرءَ جوانیں یکجائی حکمت عملی ءِ وسیلگءَ دراھیں جیڑھءُ جنجال گرءُ دار کنگ بنت، جنوبی ایشیائی ملک آنی تہا اگاں جیڑھءُ جنجال گرءُ دار کنگ مہ بنت گڈا آ گیش بنتءُ دآؤکیں نسل ءِ ھاترءَ جنجال جوڈ بنت، خطہ ءِ تہا جانءُ سلامتی ءُ سپائی ءِ آسراتی ھمک مردماں سرکنگ ءِ منصوبہ بندی ءِ ھاترءَ کانفرنس ءِ بندوبست لکھ ستاھ کرزیت۔ آئی ءَ اے گپ چارشمبے ءِ روچءَ جنوبی ایشیاءَ جانءُ سلامتی ءُ سپائی ءِ سرھال ءِ سرءَ کانفرنس ءِ بنگیجی بھر ءَ گوں تران کنانءَ کتگ۔ ملک ءِ صدرءَ گشتگ کہ اے راستی ءِ تہا ایچ وڈیں شک نیست کہ اے عہدگ ایشیا ءَ گوں بندوک اِنت وھدے کہ جنوبی ایشیااے خطہ ءِ دل اِنت۔ سرجمیں دنیااے نیمگءَ اُمیت ءَ چہ چارگءَ اِنت چیاکہ اقتصادی راہداری ءَ بازیں خطہ آنی نیامءَ دوری کتگءُ دمگی دیمروئی ءُ وشھالی ءِ یک نوکیں عہد ءِ بنیات ایر کتگ۔
