ایران و پاکستان برادر و سنگ ملک ئُ، ہڑتوم آ ملک آتا نیام اٹ گچین تعلقداریک اڈ ہلوک ئُ، سینیٹ نا ڈپٹی چیئرمین عبدالغفور حیدری نا ایرانی ریڈیو تون ہیت وگپ

اسلام آباد۔ 22دسمبر (اے پی پی) سینیٹ نا ڈپٹی چیئرمین عبدالغفور حیدری پارینے کہ ایران و پاکستان برادر و سنگت ملک ئُ و ہڑتوم آ ملک آتا نیام اٹ گچین تعلقداریک اڈ ہلوک ئُ ۔ ریڈیو تہران ئِ انٹرویو ترسا ڈپٹی چیئرمین سینیٹ پارے کہ ایران و پاکستان برادر ملک ئُ و بلوچستان نا خلقت تو ایرانی نا خڑکی ہمسایہ ئُ، ہمسایہ غاتا اسہ ایلو آ پورو حق مریک ہنداخاطران نن ایران تون تعلقداری تے سوگو کننگ اٹی است خواہی تخنہ۔ اوپارے کہ ماضی ٹی پاکستان نا ایران تون بھاز جوان تعلقداریک مسنو و آخبت اٹی نن ایران تون تعلقداری تے پین مون آ دننگ خوانہ۔ اوپارے کہ دنیا نا ہر کنڈ اٹی مسلمان تیا بیدادی کننگ انگ ئِ ، ہنداخاطران پاکستان و ایران ئِ اسہ ایلو نا تلخی تے گیرام کرسا متحد بایدے مریر۔ اومستی پارے کہ نن ایران ئِ پاک چین اقتصادی راہداری ڈٹ اٹی اوار مننگ نا خیر مقدم ئِ کینہ۔