اے پی پی و چائنہ ریڈیو انٹرنیشنل نا اقتصادی راہداری نا رداٹ جاری ڈٹ آتا اسیجائی کوریج آ امنائی

ڈپٹی ڈائریکٹر جنرل سی آر آئی ہوبانگ شینگ نا سروکی ٹی ڈل انا اے پی پی ہیڈ کوارٹر نا دورہ
اسلام آباد۔ 22دسمبر (اے پی پی) قومی خبررساں ادارہ ایجنسی”ایسوسی ایٹڈ پریس آف پاکستان “ و چینی ریڈیو”چائنہ ریڈیو انٹرنیشنل “ (سی آر آئی) چین پاکستان اقتصادی راہداری نا رداٹ جاری ڈٹ آتا اسیجائی کوریج آ امناکرینو۔ دا امنائی چارشنبے آ داڑے ڈپٹی ڈائریکٹر جنرل چائنہ ریڈیو انٹرنیشنل ہوبانگ شینگ نا سروکی ٹی سی آر آئی نا 7باسکی ڈل انا اے پی پی ہیڈ کوارٹر نا دورہ نا وخت طے مس۔ داوخت آ کڑدہ غاک خبرآتا تبادلہ نا ہم فیصلہ کریر۔ داکان مست منیجنگ ڈائریکٹر اے پی پی مسعود ملک ڈل ئِ سرکاری خبررساں ادارہ نا ملک و پیشن نا ملک ایڈیٹوریل سیٹ اپ و پیشہ وارانہ سرجزآتا بارواٹی معلومدار کرے۔ چینی ڈل اٹی ڈائریکٹر سی آر آئی اسلام آباد چن شیانگ (شاہین) ، بیوروچیف سی آر آئی وانگ چی، سی آر آئی نا سویل دے ٹکی ایشیاءڈویژن نا سروک آن شیاﺅیو، سی آر آئی نا سویل دے ٹکی ایشیاءڈویژن نا ڈپٹی ہیڈ ژاﺅچیاﺅ، نیوز سنٹر سی آر آئی نا ڈپٹی ہیڈ گوان ژوآن ژوآن و انٹرنیشنل کوآپریشن اینڈ ایکسچینج سنٹر سی آر آئی نا لوئی ہوان شنگ اوار ئسر۔ منیجنگ ڈائریکٹر مسعود ملک نا سروکی ٹی اے پی پی نا ڈل اٹی ایگزیکٹو ڈائریکٹر سہیل علی خان، ڈائریکٹر نیوز محمد نعیم چوہدری و ڈائریکٹر آئی ٹی محمد غواث خان اوار ئسر۔ ہڑتوم آ ادارہ غاتا کمامدار آک اسہ ایلو نا صحافی آزموندہ غاتیان فائدہ ہرفنگ آن بیدس ہڑتوم آ ادارہ غاتا ادارتی عملہ نا کاریم نا کچ اٹی ودکی و تربیت نا کیہی وڑوڈول آتیا درشانِ خیال کریر۔ سی آر آئی و اے پی پی کیہی کسبی معاملہ غاتیٹی عملی و بامسخت کمکاری نا مون آ دننگ کن کیہی گام گیج و وڑوڈول آتیا ہم درشانِ خیال کریر۔ سی آر آئی اسلام آباد نا ڈائریکٹر چین شیانگ(شاہین) و ڈائریکٹر نیوز اے پی پی محمد نعیم چوہدری ئِ ہڑتوم آ ادارہ غاتا نیام اٹ کسبی کمکاری نا چاروکی کن فوکل پرسن مقرر کننگانے۔ چینی ڈل انا سروک ہوبانگ شینگ پارے کہ سی آر آئی اسہ قومی نشریاتی ادارہ و اے پی پی اسہ قومی خبر رساں ایجنسی نا حیثیت اٹ ہندی و جہانی کہول آ مستند و قابل پت کوریجئِ یخینی جوڑ کننگ کیک۔ اوپارے کہ اوفتا دورہ نا مسخت جتا میڈیا آرگنائزیشن آتا بارواٹی آگاہی دوئی کننگ و اے پی پی تون بامسخت کمک نا پین وارخواہی پٹنگ نا ئِ ہرادے آخبت اٹی پین مربوط جوڑ کننگک۔ ہوبانگ شینگ پارے کہ ہڑتوم آ ادارہ غاتون اہم ایونٹس و جہانی کہول آ رونما مروک آ بدلی تا کوریج نا بابت نمان وارخواہی ارے۔ اوپارے کہ چائنہ ریڈیو انٹرنیشنل نا توجوہ داہیت آٹی ئِ کہ معلومداری سامعین اسکان دمدستی رسینگے۔ اوپارے کہ چین وپاکستان نا نیام اٹ تعلقداری اسٹریٹجک شریداری و سوگو کمکاری آ مبنی ئِ ہرادے احوالکار آتا بشخ اٹی اواری اٹ کاریم کننگ آن پین مون آ دننگ مریک۔ گڈسراٹی ڈل اے پی پی نا جتا ادارتی بشخ آتا دورہ ئِ کرے و اونا کسبی کاریم تیٹی گہری است خواہی ظاہر کریر۔ سی آر آئی نا ڈل انا سروک آک ویڈیو نیوز سروس نا سٹوڈیو ٹی سی پیک ڈٹ انا کوریج کن ہڑتوم آ ادارہ غاتا نیام اٹ کمکاری نا بارواٹی تینا خیال آتا درشانی ئِ ہم کریر۔ ہوبانگ شینگ منیجنگ ڈائریکٹر مسعود ملک ئِ ایشیامیڈیا لیڈرشپ فورم اٹی بشخ ہلنگ نا سلہ خلک ہرا بہار 2017ءٹی بیجنگ اٹی مریک۔ منیجنگ ڈائریکٹر اے پی پی مسعود ملک مہمان تے سووینیئرز ہم پیش کرے۔