خاران۔ 7 اپریل (اے پی پی) مزن وزیر شاہد خاقان عباسی ءَ گوشت کہ پاکستان ءَ جمہوریت اِنت ءُُ مدام ایش مان ایت، پاکستان مسلم لیگ (ن) ءُُ نواز شریف دیمروئی ءِ دومی نام اَنت، نواز شریف ءُُ مسلم لیگ ءِ یکیں کلوہ اِنت کہ مارا سرجمیں پاکستان ءَ را دیمروئی دیگی اِنت ءُُ سرجمیں پاکستان ءِ جیڈھ آناں گیوار کنگی اِنت، ایمنی ءِ برجائی ءِ واستہ ما سیاسی سروکی ءَ را یکجا کتگ، اُرد ءَ مزن جگری ءِ گوما دیم پہ دیمی کتگ ءُُ ھزارانی کساس ءِ ورنا آں کربانی داتگ مرچی کراچی ءَ چہ پشاور ءُُ کوئٹہ ءَ چہ لاہور ءَ تاں ملک ءَ ایمنی اِنت، ایمنی ءُُ دیمروئی یے اے سفر ءَ جاڑی دار آں۔ مرچی دو منصوبگ آنی تہءَ یکے ءِ بنگیج ءُُ یکے ءِ بُن ایشت ایر کنگ بوھگ ءَ اِنت، کساس 25ارب کلدار ءِ منصوبگ اَنت، یک مچ ءَ چہ خاران یک ارزشتی ایں منصوبگ اِت، ایشی ءَ چہ اے دمگ ءُُ سرجمیں پاکستان ءَ را نپ رسیت، وشھالی کئیت، کاروبار ، روزگار ءُُ زانت ءُُ زانش ءِ آسراتی رسیت۔ دیمروئی ءِ ھمئے کشک اِنت ءُُ دیمروئی دروگیں سوگند آں چہ نئیت، خاران ءَ بی آئی ایس پی ءُُ ھیلتھ کارڈ ءِ آسراتی پُجاری کنگ بیت۔ آ وھد دور ءُُ گستا نہ اِنت کہ بلوچستان ملک ءِ امیر تریں صوبہ جوڑ بیت، نواز شریف ءَ ایل پی جی ائیر مکس بلوچستان ءِ ھمک ضلع ءَ دیگ ءِ جار جتگ ایشی ءِ سرءَ کار کنگ بیت ءُُ آیوکیں وھد ءَ انشاء اللہ ایشرا سرجم کنگ بیت، خاران ءِ الس ءَ 2018ءَ گچین کاری ءَ پیسلہ کنگی اِنت آئی ءَ راستی ءُُ ازمت ءِ سیاست ءِ ھمبراھ داری کنگی اِنت بٹاکیں سیاست کہ ایشرا پیسر ءَ چہ الس ءَ رد کتگ، انشاء اللہ 2018ءِ گچین کاری ءَ پاکستان مسلم لیگ (ن) پیسر ءَ چہ زیات سیٹ گپت ءُُ کامیاتی دزگیر کنت۔ اے ھیالانی درشانی آئی ءَ بلوچستان ءِ دمگ خاران ءَ یک مچ۔ خاران سڑک ءُُ خضدار شہداد کوٹ سڑک ءِ بُنگیج ءِ موہ ءَ برجم داشتگیں مراگش ءَ گشتانک دیان ءَ کت۔
