مزن وزیر شاہد خاقان عباسی ءُ اوگان صدر اشرف غنی ءِ نیامءَ دو پہ دوئی ءَ گندءُ نند، اوگان صدارتی ماڑی ءَ ڈلی تک ءَ سولءُ تران کنگ بوتگ
کابل۔06اپریل (اے پی پی) مزن وزیر شاہد خاقان عباسی ءَ اوگانستان ءِ صدر اشرف غنی ءِ دعوت ءِ سرءَ دری کارانی و زیر خواجہ محمد آصف ، تہی کارانی وزیر احسن اقبال ، گورنر خیبر پختونخوا اقبال ظفر جھگڑا ، راجی سلامتی صلہ کار لیفٹیننٹ جنرل (ر) ناصر جنجوعہ مزن وزیر ءِ ھمراھی ءَ جمعہ ءِ روچءَ کابل ءِ ترءُ تراب کتگ۔ اوگان صدر ءُ مزن وزیر شاہد خاقان عباسی ءِ نیامءَ دو پہ دوئی ءَ گندءُ نندءَ پد اوگان صدارتی ماڑی ءَ ڈلی تک ءَ سولءُ تران بوتگ۔ آئی ءَ اوگانستان ءَ امنءُ ایمنی ، ناشرکاری گرءُ داری، لڑءُ باری آنی واتری، دونیمگی بیپاری ءُ دمگی نزیکی ءَ ھوار پاک اوگان سیادی ءِ دراھیں تکءُ پھناتانی سرءَ ھیالءُ لیکہ ءِ درشانی کتگ۔دوھیں رھشوناں اے گپءِ سرءَ تپاک کتگ کہ اوگانستان پاکستان ایکشن پلان برائے امنءُ یکوئی ، دونیمگی ھدوکی ءِ دراھیں جیڑھ آنی سرءَ گپ ءُ ترانءُ نزیکی کنگءِ پاھدگ مندیں فریم ورکے دنت۔ آئی ءَ امنءُ ایمنی ءُ یکوئی ءِ ھاترءَ پاک اوگان ایکشن پلان ءِ ردءَ پنچمی ورکنگ گروپ آناں گشاد کنگ ءِ پیسلہ کتگ۔ دوھیں رھشوناں دمگی نزیکی ءِ ھاترءَ وتی جزمءِ درشانی کتگءُ انچو آھاں 23فروری 2018ءَ را ترکمانستان ءَ چہ اوگانستان ءِ پائپ لائن داخل کنگءِ یکجائی بنگیج ہرات کتگ بوتگ۔ آئی ءَ ریل، روڈ ءُ گیس پائپ لائن ءِ ھاسیں منصوبہ آنی منصوبہ بندی ءُ عملدرآمد ءَ را گیش کنگءِ ھاترءَ یکجائی اقتصادی کمیشن ءِ زوت دیوان توار کنگءِ سرءَ تپاک کتگ کہ پاکستان ءُ اوگانستان ءَ ر اوسطی ایشیاءَ گوں ھم دپ کنت۔ دوھیں رھشوناں چمن، قندھار، ہرات ریلوے لائن ، پشاور ، کابل موٹر وے ءُ نزیکی ءِ دگہ منصوبہ آنی سرءَ جم کارءَ را دیمءَ برگءِ سرءَ تپاک کتگ کہ گوادر ءُ کراچی ءِ دھکہ آنی وسیلگءَ سربوھگءَ جنوبی ءُ وسط ایشیا ءَ جوانیں موھ آں چہ پاھدگ چست کن اَنت۔ آئیءَ تاپی ءُ کاسا 1000منصوبہ آنی زوت سرجمی ءِ سرءَ زور پِرداتگ۔ مزن وزیر ءَ اوگانستان ءِ چیف ایگزیکٹو ڈاکٹر عبداللہ عبداللہ ءَ گوں ھم گندءُ نند کتگ۔ مزن وزیر ءَ اوگان اُلسءِ ھاترءَ 40ہزار گندم ءِ سوگاتءُ ٹیکی دیئگ ءِ جار جتگ۔ آئی ءَ اوگان معیشت ءِ دیمروئی ءِ ھاترءَ پاکستان ءَ را اوگانستان ءِ برآمدات ءِ سرءَ گیشی ریگولیٹری ڈیوٹی ھلاس کنگءِ ھم جار جتگ۔ اوگان صدر اشرف غنی ءُ مزن وزیر شاہد خاقان عباسی ءَ وتی وتی ملک ءِ تہا امن ءُ ایمنی ، وشھالی ءُ مھکمی ءِ ھاترءَ یکجائی کار کنگءِ جزم ءِ درشانی کتگ۔ مزن وزیر شاہد خاقان عباسی ءَ اوگانستان ءِ صدر اشرف غنی ءُ چیف ایگزیکٹو عبداللہ عبداللہ ءَ را اسلام آباد ءِ ترءُ تا ب ءِ دعوت ھم داتگ۔ مزن وزیر ءَ اوگانستان ءِ دراھیں نسلی گلاناں پاکستان ءِ حکومت ءُ اُلس ءِ نیمگءَ چہ نیکیں واھگانی درشانی ءِ ھاترءَ گلبدین حکمت یار، استاد محمد محقق ، استاد محمد کریم خلیلی‘ پیر سید حامد گیلانیءَ ھوار سینئر سیاسی رھشوناں گوں ھم گندءُ نند کتگءُ اوگانستان ءِ تہا امن ءُ ایمنی ءُ مھکمی ءِ ھاترءَ پاکستان ءِ جزم ءِ درشانی کتگ۔
