مزن وزیر باؤ فورم فار ایشیاءِ ھمک سالی دیوان ءَ گشتانک ءَ ابید چین ءِ صدر رشی جن پنگ ءَ گوں گند ءُُ نند کنت
اسلام آباد۔ 6 اپریل (اے پی پی)مزن وزیر شاہد خاقان عباسی باؤ فورم فار ایشیا ءِ ھمک سالی دیوان ءَ بھر زوری ءِ ھاترا باندا یک شمبے ءِ روچ ءَ چین ءِ جزیرہ ہینان ءِ زرباری شہر سان یا ءَ پُج ایت۔ سرکاری ھال در آنی رد ءَ وزیر ءِ درئی کار خواجہ محمدآصف، وزیرتوکی کار پروفیسراحسن اقبال ءُُ بُنجاھی وزیر پاوراویس احمدخان لغاری ھم بھر زوری ءِ کنگ ءَ مزن وزیر ءِ ھمبراھ بنت۔ باؤفورم فارایشیاءِ ھمک سالی دیوان ءَ گشتانک ءَ ابید مزن وزیر چین ءِ صدرشی جن پنگ ءَ گوں گند ءُُ نند ءُُ آئی ءَ گوں دو نیمگی، دمگی ءُُ میاں اوستمانی کار آنی سرءَ ھیال ریچی ھم کنت گوں۔ مزن وزیر ءَ 8ءَ چہ 11 اپریل ءَ تاں برجم داشتگیں باؤفورم فارایشیاءَ بھر زوری ءِ دعوت رستگ۔ گوزوکیں سال باؤفورم فارایشیاءِ بُن گپ ’’ٹوھیں وشھالی ءِ واستہ آزات ءُُ سالمیں ایشیا‘‘ ایر کنگ بورتگ۔ فورم ءَ چہ آسٹریلیاءِ صدر الیگزینڈر وان ڈیربیلین ، فلپائن ءِ صدرروڈریگوڈیوٹرٹ، منگولیا ءِ مزن وزیر یوخاجن کورل سوک، ہالینڈ ءِ مزن وزیر مارک روٹ،سنگاپور ءِ مزن وزیر لی سین لونگ، اقوام متحدہ ءِ سیکرٹری جنرل انٹونیوگوئتریش ءُُ میاں اوستمانی مالیاتی فنڈ ءِ منیجنگ ڈائریکٹرکرسٹیان لاگارڈے گشتانک دینت۔ فورم ءَ گوں گشتانک کنوکیں سروک دو نیمگی پراھ ءُُ شاھیگانیں کمکی، میاں اوستمانی سروکی، معشیت ءُُ تجارت ءِ بابت ءَ المی ایں کار آنی سرءَ چار ءُُ تپاسی زور اَنت ءُُ ھیال ریچی کن انت۔ چین ءِ صدر شی جن پنگ فورم ءَ گوں وتی گشتانک ءَ چین ءِ معشیت ءَ را گیش پزور ءُُ آزات کنگ ءِ بابت ءَ گامگیج آنی جار ءَ ھم جنت۔ فورم ءَ 2 ھزور ءَ چہ گیش نماھندگ آنی بھر زوری کنگ ءِ امیت اِنت۔
