کابل ۔06اپریل (اے پی پی) مزن وزیر شاہد خاقان عباسی اوگان صدر محمد اشرف غنی ءِ دعوت ءِ سرءَ اوگانستان ءِ یک روچی ترءُ تابءَ جمعہءِ روچءَ کابل ءَ سربوتگ۔ دری کارانی و زیر خواجہ محمد آصف ، تہی کارانی وزیر احسن اقبال ، گورنر خیبر پختونخوا اقبال ظفر جھگڑا ، راجی سلامتی صلہ کار لیفٹیننٹ جنرل (ر) ناصر جنجوعہ مزن وزیر ءِ ھمراھ اَنت۔ اوگان صدارتی ماڑی ءَ سربوھگءَ مزن وزیر ءِ شرپ ءَ مراگشے کنگ بوتگ۔ اوگان صدر اشرف غنی ءَ مزن وزیر ءَ را وش اَتک کتگ۔ مزن وزیر ءَ اوگان سلاھ بندیں فوج ءِ دستہ ءَ گارڈ آف آنر پیش کتگ۔ وش اَتکی مراگشءَ پد مزن وزیر ءِ پجاروکی کابینہ ءَ گو ں کنگ بوتگ۔ مزن وزیر ءِ او گانستان ءِ ترءُ تابءِ مول ءُ مراد دونیمگی سیادی ءَ را گیش کنگءُ دوھیں ملک ءُ خطہ ءِ تہا مھکمیں امنءُ ایمنی، مھکمی ءُ اقتصادی وشھالی ءِ ھاترءَ یکجائی کوشستاناں ترند جوڈ کنگءَ کمک کنگ اِنت۔ مزن وزیر اوگان سروکی ءِ گوما دونیمگی سیاسی اقتصادی، سلامتی ءُ ناشرکاری گرءُ داری کمک ، اوگان لڑءُ باری آنی واتر، منشیات ءِ گرءُ دار ، اوگان امنءُ ایمنی عمل ءُ دمگی سیاسی ءُ سکیورٹی جاورھال ءَ ھوار دونیمگی کارانی سرءَ الکاپی ءَ شورءُ صلہ کنت۔ پاکستان اوگانستان ءَ بنکی ڈھانچہ ، وانگءُ زانگ ءُ جانءُ سلامتءِ پڑآں استعداد کارءَ گیشی ءِ وسیلگءَ اوگانستان ءِ دیمروئی کوشستانی تہا کمک ءَ را جاری داریت۔ اے ھوالگءَ مزن وزیر اوگان قیادت ءِ گوما دوھیں ملک آنی نیامءَ سفری آسراتی ءِ وڈءُ پیم ، تعلیمی کمک ءُ پاکستان ءَ اوگان شہرآنی طبی آسراتی ءُ دوھیں ملک آنی نیامء بیپاری ءُ راہداری آسراتی ءَ را گیش کنگءِ سرءَ ھم گپءُ تران کن اَنت۔
