مزن وزیر شاہد خاقان عباسی ءُ اوگان صدر اشرف غنی ءِ نزیکی ءِ وسیلگءَ چہ دمگی سلامتی ءِ یکجائی مولءُ مراد ءِ سرءَ تپاک، دوھیں رہنماآنی نیامءَ ڈلی تک ءَ وشیں ءُ دوست ناکیں چاگردءَ سولءُ تران ، ارگ مسیتءَ یکجاھ جمعہ ءِ نماز ونت
کابل۔06اپریل (اے پی پی) مزن وزیر شاہد خاقان عباسی ءُ اوگان صدر اشرف غنی ءِ نزیکی ءِ وسیلگءَ چہ دمگی سلامتی ءِ یکجائی مولءُ مراد ءِ سرءَ تپاک کتگ۔ اے تپاکی دوھیں رھشونانی نیامءَ جمعہ ءِ روچءَ ڈلی تک ءَ سولءُ ترانءِ تہا بوتگ کہ اوگان صدارتی ماڑی ءَ بوتگ۔ مزن وزیرءِ کارگسءِ نیمگءَ چہ جاری بیانءِ تہا سولءُ تران سک باز وشءُ دوستناکیں چاگرد ءِ تہا بوتگ۔ اوگان صدر ءَ مزن وزیر ءُ آئیءِ ڈل ءَ را وش اَتک کتگ وھدے کہ مزن وزیر وش اَتک کنگءُ مہمان جہلی کنگءَ اوگان صدرءِ شگرءُ منت گپتگ۔ مزن وزیر شاہد خاقان عباسی ءَ اوگان صدرءَ را پاکستانءِ ترءُ تاب کنگءِ دعوت داتگ۔ اوگان صدر اشرف غنی ءَ مزن وزیرءُ آئی ءِ ڈل ءِ شرپ ءَ ناری ءِ نان کتگ۔ ایشی ءَ ابید مزن وزیر شاہد خاقان عباسی ءُ اوگان صدر اشرف غنی ءَ ارگ مسیت ءَ جمعہ ءِ نماز ونت۔ ایشی ءَ پیسر مزن وزیر شاہد خاقان عباسی اوگان صدر محمد اشرف غنی ءِ دعوت ءِ سرءَ اوگانستان ءِ یک روچی ترءَ تابءَ جمعہ ءِ روچءَ سر بوتگ۔ دری کارانی و زیر خواجہ محمد آصف ، تہی کارانی وزیر احسن اقبال ، گورنر خیبر پختونخوا اقبال ظفر جھگڑا ، راجی سلامتی صلہ کار لیفٹیننٹ جنرل (ر) ناصر جنجوعہ مزن وزیر ءِ ھمراھ اَنت۔اوگان صدارتی ماڑی ءَ سربوھگءَ مزن وزیر ءِ شرپءَ مراگشے کنگ بوتگ۔ اوگان صدر اشرف غنی ءَ مزن وزیر ءَ را وش اَتک کتگ۔ مزن وزیرءَ اوگان سلاھ بندیں فوج ءَ گارڈ آف آنر پیش کتگ۔ اے موھءِ سرءَ دوھیں ملک آنی راجی سوت جنگ بوتگ اَنت۔ وش اَتکی مراگشءَ پد مزن وزیرءِ پجاروکی اوگان کابینہ ءَ گوں کنگ بوتگ وھدے کہ مزن وزیر ءَ وتی ڈلءِ باسکانی اوگان صدرءَ گوں پجاروکی کتگ۔
