ناشرءِ ھلاپ ءِ جنگءَ پاکستان ءِ وڈیں سوبمندی دگہ ایچ ملکءَ حاصل نہ کتگ اَنت، پاکستانی اُلسءَ ناشرکاری ءَ را نہ من اِتگ،
اسلام آباد۔05 اپریل (اے پی پی) مزن وزیر شاہد خاقان عباسی ءَ گشتگ کہ دنیاءِ تہا اے وڈیں ایچ ملک نیست کہ آئی ءَ ناشرکاری ءِ ھلاپ ءِ جنگءَ پاکستانءِ وڈیں سوبمندی ھاصل کتگ، دنیاءَ ناشرکاری ءِ ھلاپ ءَ مئے کوشستاناں ساڑاتگ بلے مئے جزم نیزور نہ بوتگ، پاکستان مرچی یک ساپیں پلگاریں ملک اِت،دیمروئی ءُ وشھالی ءِ منصوبہ دیمءَ پیداک اَنت، سی پیک منصوبہ ءَ چہ پاکستان مشرق وسطیٰ ءُ یورپ ءَ گوں بندوک بیت، جیڑھ ءُ جنجالاں گوں دیم پہ دیم بوھگ ءَ بلد اَنت، اُلس ءَ دائم ناشرکار نہ من اِتگ اَنت، قندوز ءَ زھگاناں جنگءُ کوشگ ءِ سرءَ سک باز اپسوز اِنت اے وڈیں وئیلاں چہ ناشرکاری ودی بیت، میاں اوستمانی براتی مقبوضہ کشمیر ءَ انسانی ھکانی ھلاپ ورزی ءَ را بہ داریت، پاکستانءَ وتی بھرءِ کار کتگءُ کنگءَ اِنت دنیا ھم وتی بھرءِ کارءَ بہ کنت۔ پنچ شمبے ءِ روچءَ میاں اوستمانی ناشرکاری گرءُ داری فورم ءَ گوں تران کنانءَ مزن وزیر ءَ گشتگ کہ سوویت یونین ءِ ھلاس بوھگءَ پد میاں اوستمانی دلگوشی مٹ بوتگ اَنت۔ پاکستانءَ اے جنگءِ تہا مزنیں نیادے داتگ۔ پاکستانءَ ناشرکاری ءِ اُرشانی تہا بینظیر بھٹو شہیدءَ ھوار بازیں ہزاراں جان ندر کتگ اَنت۔ چرچ، مسیت، وانگ جاھ ، مزار اں ھوار ایچ جاھ ھم ناشرکاری ءَ چہ محفوظ نہ بوتگ۔ اوگان جنگءَ پد منشیات عام بوتگ۔ آرمی پبلک وانگ جاھ ءِ سرءَ اُرشءَ چکانی شہادت ءِ وئیل مٹی ءِ بندات بوتگ ءُ سرجمیں راجءَ ناشرکاری ءِ ھلاپ ءَ جنگ کنگءِ پیسلہ کتگ۔ ناشرکاری ءِ ھلاپ جنگءَ مہ باز سیاسی ، جانی ءُ مالی نقصان چست کتگ۔ نیشنل ایکشن پلانءِ سرءَ عملدرآمد ءِ ھاترءَ نیکٹا جوڈ بوتگ، جاورھال ءَ را گرءُ دار کنگءِ ھاترءَ ترندیں گامگیج کنگءِ ضلورت بوتگ۔ پاکستانءَ وتی شہر، سیمسرءُ قبائلی دمگاں آپریشن کتگ ءُ مرچی مہ پھرءَ گوں گشتگ کن اَنت کہ فوج ، پولیس ءُ کانود نافذ کنوکیں ادارگءُ اُلسءِ قربانی آنی برکتءَ چہ مہ اے جنگءِ تہا سوبمند بوتگ اَنت۔ مہ اے جنگ وتی وسءُ واک ءَ چہ کتگ، دنیاءَ کجام ھم ملکءَ ناشرکاری ءِ گرءُ دار کنگءِ ھاترءَ 2لکھ فوج تعینات نہ کتگ۔ مہ باز جیڑھءُ جنجالی ءِ دیمپانی کتگ۔ آئی ءَ گشتگ کہ سی پیک وڈیں منصوبہ جوڈ بوھگءَ اَنت۔آئیءَ گشتگ کہ ایچ ملک ءِ 18سد عالماں ناشرکاری ءُ وت کش اُرشءِ ھلاپ ءَ فتویٰ نہ داتگ۔ آئیءَ گشتگ کہ پاکستان اوگانستان ءِ تہا امنءُ ایمنی کنگءِ ھاترءَ کوشست کنگءَ اِنت۔ پاکستانءَ چہ گیش اوگانستانءِ تہا امنءُ ایمنی ءِ منوک کس نہ اِنت۔ مزن وزیر ءَ قندوز ءَ زھگانی سرءَ اُرشءِ وئیلءِ سرءَ اپسوزءِ درشانی کتگءُ گشتگ کہ اے وڈیں وئیلاں چہ ناشرکاری گیش بیت۔ مزن وزیر ءَ یکشمبے ءِ روچءَ مقبوضہ کشمیر ءَ 17کشمیری ورناھ آنی کوشءَ را ایر جتگءُ گشتگ کہ ایشی ءَ چہ ناشرکاری ودی بیت۔ آئیءَ گشتگ کہ مارا اے سوب ھلاس کنگ لوٹ اَنت کہ ایشاں چہ ناشرکاریءُ بیمکاری ودی بنت۔ آئیءَ ناشرکاری ءِ ھلاپ ءَ میاں اوستمانی فورم ءِ برجمی ءِ سرءَ وشی ءِ درشانی کتگءُ گشتگ کہ پاکستانءَ ناشرکاری ءِ ھلاپ ءِ جنگءَ وتی بھر ءِ کار کتگ ءُ کنگءَ اِنت دنیاءَ را ھم وتی بھرءِ کار کنگ لوٹ ایت۔
