پاکستان کشمیرءِ جیڑھءُ جنجالءَ را گیشءُ گیوار کنگءِ ھاترءَ ھرچ تکءَ وتی کوشستاں جاڑی داریت،
مظفر آباد۔04اپریل (اے پی پی ) مزن وزیر شاہد خاقان عباسی ءَ گشتگ کہ پاکستان کشمیرءِ جیڑھءُ جنجالءَ را گیشءُ گیوار کنگءِ ھاترءَ ھرچ تکءَ وتی کوشستاں جاڑی داریت۔ چارشمبے ءِ روچءَ کل جماعتی حریت کانفرنس ءِ نمائندگاں گوں گپءُ تران کنانءَ کتگ کہ شاہدخاقان عباسی ءَ گشتگ کہ آ وت ءُ آئیءِ کابینہ ءِ باسک کشمیری ءِ اُلس ءَ گوں یکوئی ءِ درشانی ءِ ھاترءَ آزاد کشمیرءَ اَتکگ اَنت۔ آئیءَ گشتگ کہ بنجاھی کابینہ ءِ ھاسیں دیوانءِ تہا مقبوضہ کشمیر ءِ اُلس ءِ سرءَ بھارتی فوجءِ زُلمءُ ناھکی ءِ سرءَ رنجءُ گمءِ درشانی کنگ بوتگ۔ مزن وزیرءَ حریت نمائندگاناں ھال داتگ کہ کابینہ ءِ ھاسیں دیوانءِ تہا بھارتی فوجءِ زُلمءُ ناھکی ءَ را سک باز ایرجتگ۔ مزن وزیر ءَ گشتگ کہ دری کارانی وزارت ءُ دراھیں سفارتی مشنز اقوام متحدہ ءِ سلامتی کونسل ءِ تپاک نامہ آنی سرءَ عمل درآمد کنگءِ ھاترءَ کار کنگءَ اَنت۔ شاہد خاقان عباسی ءَ حریت کانفرنس ءِ رہنما ءُ نمائندگانی کشمیرءِ جیڑھءُ جنجالءِ گیشءُ گیوار کنگءِ کوشستءُ قربانی آناں دادءُ سلام پیش کتگ۔ آل پارٹیز حریت کانفرنس ءِ نمائندگاں پاکستان ءِ حکومت ءُ مزن وزیرءِ شگرءُ منت گپتگءُ گشتگ کہ مقبوضہ کشمیر ءِ تہا بھارتی زُلمءُ ناھکی ءِ ویئلانی سرءَ گامگیج چست کنگ بوتگءُ کابینہ ءِ ھاسیں دیوان توار کنگ بوتگ۔ حریت نمائندگ آں مزن وزیر شاہد خاقان عباسی ءُ کابینہ ءِ باسکانی آزاد کشمیرءِ ترءُ تاب کنگءَ آئیءِ شگرءُ منت گپتگ۔ مزن وزیرءَ حریت نمائندگاں گوں گندءُ نند ءِ تہا آزاد کشمیر ءِ مزن وزیر راجہ فاروق حیدر ، آزاد کشمیر ءِ صدر سردار مسعود خان، مزن گسءِ کشمیر کمیٹی ءِ سروک مولانا فضل الرحمان ، دری کارانی وزیر خواجہ محمد آصف، کشمیر امورءِ وزیر چوہدری برجیس طاہر، بنجاھی وزیر مشاہد اللہ ، رانا تنویر حسین ءُ ممتاز احمد تارڑ ھم ساڑی بوتگ اَنت۔ گندءُ نندءِ تہا حریت رہنما غلام محمد صفی، فیض نقشبندی، محمود ساگر،اشتیاق حمید، محترمہ شمیم شالءُ اعجاز لون ھوار بوتگ اَنت۔ ایشی ءَ چہ پیسر مزن وزیر شاہد خاقان عباسی مظفر آباد ءَ سربوھگءَ آزاد کشمیرءِ صدر سردار مسعود خان، آزاد کشمیر ءِ مزن وزیر راجہ فاروق حیدر ، آزاد کشمیرءِ اسمبلی ءِ اسپیکر ءُ دگہ سینئر حکام ءَ وش اَتک کتگ۔
