ایبٹ آباد کمیشن نا رپورٹ ئِ لس کننگ نا فیصلہ آن مست اونا جاچ ئِ ہلیوہ
سراجیوو(بوسنیا)۔22دسمبر (اے پی پی) وزیراعظم محمد نواز شریف پارینے کہ او ایبٹ آباد کمیشن نا رپورٹ ئِ لس کننگ نا فیصلہ آن مست اونا جاچ ئِ ہلیک۔ بوسنیا نا دورہ غا ہنوک آ صحافی تتون ناشتہ آہیت وگپ کرسا وزیراعظم پارے کہ وطن آ پدی بننگ آ او دا رپورٹ نا جاچ ئِ ہلیک۔ وزیراعظم دا دے تیٹی بوسنیا نا مسہ دے ئی سرکاری دورہ غاٹیئِ۔ ہراتم اوڑآن پاکستان پیپلزپارٹی نا شریک چیئرپرسن آصف علی زرداری نا وطن آ پدی بننگ نا بابت ہریفنگاتو اوپارے کہ سچ ہریفرہ تو کنے اونا وطن آ پدی بننگ آ خوشی ئِ۔ اودے پدی برسا تینا پارٹی نا معاملہ غاتے ہروئی مرے۔ وزیراعظم پارے کہ او سیاسی رابطہ غاتا حق اٹی ئِ و او پیپلزپارٹی تون میثاق جمہوریت آ دستخط ہم کرے۔ وزیراعظم پارے کہ او پاکستان پیپلزپارٹی نا دور حکومت اٹی وخت اس ہم حکومتی نظام ئِ خراب کننگ نا کوشست ئِ کتنے۔ پیپلزپارٹی تون اختلاف آتا باوجود اونا جماعت دھرنہ و برانز نا پالیسی ئِ اختیار کتو، اوپارے کہ 2016ءاونا حکومت کن اسہ مشکل ئُ سال اس ئس ولے دا گچین وڑاٹ ایسر پذیر مننگ والا ئِ۔ ملک انا معاملہ غاتے چلیفنگ ہر اسٹ نا زمواری اف و خاص کر دھرنہ غاتا عادت آن مجبور خلقت آتا داکاریم اف۔ پرویز مشرف نا پن ئِ ہلنگ آن بیدس وزیراعظم پارے کہ ہفت ٹکی ایجنڈا ہچ ئُ مثبت بدلی اس اتیتنے و او قوم ئِ بجلی نا لوڈشیڈنگ نا عذاب اٹی مبتلا کرسا ہلا۔ وزیراعظم دا تاثر ئِ مسترد کرے کہ اونا حکومت توانائی نا تنکی ئِ ہنداخاطران چٹفنگ خوائک کہ او بروک آ لس گچین کاری تے کٹنگ کے۔ دراصل اونا حکومت غٹ ویل آتے ایسر کننگ خوائک و حکومت ہر بشخ اٹی اصلاحات اتنگ نا پالیسی آ عمل کننگ اٹی ئِ۔ نواز شریف پارے کہ او تینا پارٹی منشور آ عمل کننگ کن کاریم کننگ ئِ۔ اوپارے کہ مچ آ ملک اٹی 49پوسکن ئُ ہسپتال آتا جوڑ جاڑ نا ڈٹ آتے فعال وڑاٹ تینا کننگ انگ ئِ وخت اس کہ کیہی ضلع غاتا الس ئِ ہیلتھ کارڈ ہم جاری کننگانے۔ وزیراعظم پارے کہ ایل این جی و سولر پلانٹ آتا ڈٹ آتیٹی شفافیت ئِ باوری جوڑ کننگ انگ ئِ ۔ قومی خزانہ ٹی 100 ارب روپئی نا بچت کننگانے۔ چار ریگولیٹری اتھارٹی تے حکومتی کنٹرول اٹی کننگ نا بابت اسہ سوج اسے نا ورندی ٹی اوپارے کہ دا ریگولیٹری باڈی تا مسخت پرائیویٹ سیکٹر ئِ ریگولیٹ کروئی ئس ولے او حکومت ئِ ریگولیٹ کننگ نا بنائِ کریر۔ دا ریگولیٹر باڈی تا دا وڑوڈول نا سوب کیہی ڈٹ آتیٹی تاخیر مس ہرا کہ ہچ وڑاسے ٹی سگ انا قابل افس۔
